Ռուսաստանը կարող է խանդով արձագանքել Հայաստանի եւ ԵՄ-ի մերձեցմանը, ինչպես նաեւ Լեռնային Ղարաբաղի նախագահ Բակո Սահակյանի ԱՄՆ կատարած այցին։ Այս մասին մարտի 24-ին՝ լրագորղների հետ հանդիպման ժամանակ նշել է քաղաքագետ Ալեքսանդր Մանասյանը։
Նրա խոսքով, Հայաստանը չպետք է իրականացնի «ե՛ւ․․․ե՛ւ» քաղաքականություն՝ այդպիսով, փորձելով մերձենալ Արեւմուտքի հետ։
«Մենք պետք է խոսենք այն մասին, որ գտնվում ենք քաղաքակրթությունների խաչմերուկում եւ երկխոսության հարթակ ենք հանդիսանում։ Մենք մշտապես խոսում ենք «ե՛ւ․․ե՛ւ» քաղաքականության մասին, սակայն ռուսական քաղաքագետները բազմիցս նշել են, որ միանգամից երկու աթոռի նստել հնարավոր չէ»,-նշել է քաղաքագետը։
Մանասյանի կարծիքով, Հայաստանին տրվել է բացառիկ պատմական հնարավորություն՝ տարբեր քաղաքակրթությունների համար դառնալ հարթակ։ Նա հավելել է, որ այդ դեպքում դա Կրեմլի դժգոհությունն առաջ չի բերի, քանի որ այդ համատեքստում ե՛ւ Հայաստանը, ե՛ւ Ղարաբաղը ծանրակշիռ դեր կունենան։