Շատերը կարծում էին, որ ես այլեւս երբեք բեմ չեմ վերադառնա, շատերը կարծում էին, թե ընդհանրապես կկոտրվեմ եւ երբեք ոտքի չեմ կանգնի, բայց ես գիտեի, որ նորից պետք է բեմ վերադառնամ: Լիբանանի հայկական «Ազդակ» պարբերականին տված հարցազրույցում այս մասին ասել է հայտնի դերասան Վարդան Պետրոսյանը:
Ավելի քան երեք տարի բանտում անցկացրած դերասանը խոստովանել է, որ դյուրին չէր նորից բեմ բարձրանալ՝ ե՛ւ ֆիզիկապես, ե՛ւ հոգեպես, բայց գիտեր, որ պետք է վերադառնա, հանդիսատեսի համար եւ նրա շնորհիվ:
«Ես շատ երջանիկ մարդ եմ, հոգեկան մեծ բավարարավածություն եմ ստանում իմ ելույթներից, հանդիսատեսի հետ փոխհարաբերությունից: Ինձ համար շատ մեծ նվեր է՝ ունենալ հանդիսատես, որը հարազատ է դառնում, բարեկամ, ընկեր, հանդիսատես, որն այս վերջին տարիներին կիսեց իմ ճակատագրի դժվար ժամանակաշրջանը, իսկ հիմա գալիս է՝ բեմ վերադարձիս առիթով ինձ ողջունելու»,- ասել է դերասանը:
Փետրվարին Վարդան Պետրոսյանը նոր՝ «Իմ կիսատ թողած երգը» շոուն ներկայացրել է Լոս Անջելեսում, իսկ այս օրերին Բեյրութում էր: Դերասանը նշել է, որ առաջիկայում պատրաստվում է նաեւ Հայաստան գալ՝ նոր բեմադրությունը ներկայացնելու:
«Լոս Անջելեսի ներկայացումներից ապշեցի, որովհետեւ դահլիճը լի էր երիտասարդներով: Նշանակում է՝ փոքր երեխաներն իմ ներկայացումներով են մեծացել, եւ հիմա եկել էին՝ ողջունելու վերադարձս, ողջունելու, որ ես ոչ միայն չկոտրվեցի, այլեւ համարձակություն ունեցա վերադառնալ ու խոսել իմ դառն օրերի մասին»,- պատմել է սիրված դերասանը:
Նա խոստովանել է, որ դատաքննության եւ բանտում անցկացրած ժամանակաշրջանը հոգեբանորեն չափազանց բարդ փուլ էր իր համար. դժվարությամբ է դիմակայել իր նկատմամբ գործադրվող հոգեբանական ճնշումներին ու դատարանի դահլիճում ստեղծված մթնոլորտին: «Գիտեի, որ անընդհատ պետք է լռեմ, որովհետեւ թակարդներ էին լարվում իմ դեմ: Շատ դժվար էր ինձ համար: Երբեմն աթոռն այնքան ամուր էի սեղմում, որ կարծես պետք է կոտրեի, բայց կարողանա տանել այդ ամենը»,- վերհիշել է դերասանը:
Բեմադրությունից զատ՝ Վարդան Պետրոսյանը նաեւ հուշեր է գրում. շուտով գիրքը նույնպես կհանձնի երկրպագուների դատին: «Այն ամենը, ինչ բեմ եմ բարձրացրել, ինչ տեղ է գտել գրքում, մեկ տասներորդն է այն ամենի, ինչ ապրեցի բանտում, որովհետեւ կան շատ-շատ բաներ, որոնց մասին չեմ ուզում խոսել, որոնց մասին կարիք չկա խոսելու»,- հավելել է դերասանը:
Վարդան Պետրոսյանի հարցազրույցին ամբողջությամբ կարող եք ծանոթանալ այստեղ:
Վարդան Պետրոսյանի առաջին րոպեները ազատության մեջ. NEWS.am-ի բացառիկ տեսանյութը
Վարդան Պետրոսյանն առաջին ներկայացումը կբեմադրի բանտարկյալների մասին (Ֆոտո)
Հակոբյանները եւս երկու դատական հայց կներայացնեն Վարդան Պետրոսյանի դեմ. փաստաբան
