Ղարաբաղյան հարցի շուրջ Թուրքիայի եւ Ռուսաստանի միջեւ որևէ պայմանավորվածություն չկա: Այս մասին մարտի 26-ին ՀՀ ԱԺ-ում լրագրողների հետ զրույցում նշեց ՌԴ Պետդումայի ԱՊՀ գործերով, եվրասիական ինտեգրման եւ հայրենակիցների հետ կապերի կոմիտեի նախագահի տեղակալ Կոնստանտին Զատուլինը:
Ռուսական կողմը, ըստ նրա, Հայաստանի հետ իր հարաբերությունների հետագա զարգացման վերաբերյալ չի խորհրդակցում ո՛չ Թուրքիային, ո՛չ որեւէ այլ երկրի հետ: «Իմ կարծիքով՝ դրա համար որեւէ հիմք կամ պատճառ չկա: Մենք հայ-թուրքական արձանագրությունների կողմնակիցն էինք եւ կողմ էինք հանդես գալիս Հայաստանի՝ թե՛ մի, թե՛ մյուս կողմից շրջափակման վերացմանը», - ասաց Զատուլինը:
Ընդ որում, ինչպես նա նշեց, Անկարայում հիանալի հասկանում են, որ Կրեմլը մի կողմում չի մնա և լիովին կիրացնի Երեւանի նկատմամբ իր պարտավորությունները, եթե Թուրքիան հանկարծ որոշի ագրեսիվ քաղաքականություն վարել Հայաստանի նկատմամբ, ինչպես դա տեղի ունեցավ Սիրիական Աֆրինի դեպքում:
Միեւնույն ժամանակ, ռուս պատգամավորը նշեց, որ նրանք փորձում են համագործակցել սիրիական հակամարտության կարգավորման շուրջ ինչպե՛ս թուրքական կողմի, այնպե՛ս էլ իրանական կողմի հետ` շեշտելով, որ կան որոշակի ուժեր, որոնք փորձում են ցանկացած կերպ ձախողել համաձայնությունները: Ամենից շատ, ըստ Կոնստանտին Զատուլինի, դրանում անմիջականորեն շահագռգռված են Վաշինգտոնում: