Մարտի 26-ին արտգործնախարար Էդվարդ Նալբանդյանն ընդունեց Հայաստանում Իռլանդիայի նորանշանակ դեսպան Մայքլ Ֆորբսին (նստավայրը՝ Սոֆիա)՝ հավատարմագրերի պատճենի հանձնման կապակցությամբ:
Շնորհավորելով Մայքլ Ֆորբսին` նախարար Նալբանդյանը հույս հայտնեց, որ նորանշանակ դեսպանն իր նպաստը կբերի հայ-իռլանդական հարաբերությունների առավել խորացմանը եւ ամրապնդմանը:
Շնորհակալություն հայտնելով ընդունելության համար՝ դեսպան Ֆորբսը հավաստիացրեց, որ իր պաշտոնավարման ընթացքում կներդնի առավելագույն ջանքերը հայ-իռլանդական հարաբերություններին նոր լիցք հաղորդելու համար:
Հանդիպման ընթացքում Էդվարդ Նալբանդյանը եւ Մայքլ Ֆորբսը քննարկեցին երկկողմ օրակարգի հարցեր, անդրադարձան քաղաքական երկխոսության ակտիվացման եւ առեւտրատնտեսական կապերի զարգացման ուղղությամբ համատեղ քայլերին, ընդգծեցին միջխորհրդարանական կապերի ակտիվացման, իրավապայմանագրային դաշտի ընդլայնման, մշակույթային փոխանակումների խթանման կարեւորությունը:
Երկուստեք նշվեց, որ Հայաստան-Եվրամիություն Համապարփակ եւ ընդլայնված գործընկերության համաձայնագրի ստորագրումը կարող է հնարավորություններ ընձեռել ինչպես Հայաստան-ԵՄ ձեւաչափում, այնպես էլ երկկողմ հարաբերությունների առավել խորացման եւ ընդլայնման համար:
Նախարար Նալբանդյանը դեսպան Ֆորբսին ներկայացրեց ղարաբաղյան հիմնախնդրի խաղաղ կարգավորմանն ուղղված Հայաստանի եւ ԵԱՀԿ Մինսկի խմբի համանախագահ երկրների համատեղ ջանքերը:
