Կեմերովոյի «Զիմնյայա վիշնյա» առեւտրի կենտրոնում հրդեհի հետեւանքով 41 երեխա է մահացել, հաղորդում է «Ինտերֆաքս»-ը: Հրդեհի զոհ է դարձել ընդհանուր առմամբ 64 մարդ: Ցուցակները հրապարակվել են մահացածների հարազատների կողմից ստեղծված շտաբում: Նախաձեռնող խումբը այցելել է դիարանը, ուր բերվել էին զոհերի մարմինները: Ակտիվիստների խոսքով՝ «այնտեղ մոտ 20 մեծահասակ կար, մնացածը երեխաներ էին. մարմինները չեն թաքցրել, մենք ստուգել ենք բոլոր կաբինետները, նկուղը, վերնահարկը, ավտոտնակները»:
Ավելի վաղ Կեմերովոյի բնակիչներն անվստահություն էին հայտնել զոհերի թվի կապակցությամբ: Սոցիալական ցանցերում տեղեկություն էր տարածվել 300-400 զոհի մասին: Մասնավորապես, նման տվյալներ էին հրապարակվել «Ռոսիա 24» հեռուստաալիքի՝ «Վկոնտակտե» սոցցանցի էջին: Հաղորդվում էր, որ այդ տեղեկությունը տեղադրվել է հեռուստաալիքի էջը կոտրած հաքերների կողմից:
Ռուսաստանի Դաշնության Քննչական կոմիտեում (ՔԿ) հարյուրավոր զոհերի մասին լուրերը հերքվել են: ՔԿ-ն քրեական գործ է հարուցել 3 հոդվածի հիման վրա: Մի քանի մարդ ձերբակալվել է: Քննության տվյալներով՝ առեւտրի կենտրոնում հրդեհի ազդանշանային համակարգը չէր գործում, իսկ հրդեհի օրը հերթապահող անվտանգության աշխատակիցը չէր միացրել ազդարարման համակարգը: