Հայաստանը եվրոպական երկրների համար կարեւոր գործընկեր է: Այս մասին Լյուքսեմբուրգի ԱԳ նախարար Ժան Ասելբորնը հայտարարեց Հայաստանի ԱԳ նախարարի հետ հանդիպումից հետո կայացած մամուլի ասուլիսում:
«Սա Հայաստանի համար կարեւոր տարի է: Երեւանը դառնում է 2800 տարեկան, հանրապետությունը նշում է անկախության 100-ամյակը, աշնանը կանցկացվի Ֆրանկոֆոնիայի գագաթնաժողովը»,- նշեց Ասելբորնը:
Երեւան այցի շրջանակում նա կմասնակցի Լյուքսեմբուրգի պատվավոր հյուպատոսության բացմանը: Պատվավոր հյուպատոս է նշանակվել Սուրեն Զոհրաբյանը: «Լյուքսեմբուրգը տարածաշրջանում դեռեւս դեսպանատուն չունի: Սակայն սա առաջին քայլն է»,- նշեց Ասելբորնը: Խոսելով տնտեսական հարաբերությունների զարգացման մասին, նա նշեց, որ դրա համար մեծ հնարավորություններ կան: «Լյուքսեմբուրգը ներդրումային հիմնադրամներ ունի, մենք աշխարհում ըստ այդ հիմնադրամների երկրորդ պետությունն ենք, մոտ 4 տրլն եվրո: Ցավոք, փողը մերը չի, այլապես կկիսվեինք»,- կատակեց Լյուքսեմբուրգի ԱԳ նախարարը:
Հայաստանի ԱԳ նախարար Էդվարդ Նալբանդյանը նշեց 2 երկրների միջեւ հաստատված ակտիվ կապերի մասին՝ հավելելով, որ այցը լավ առիթ է հարցեր քննարկելու համար, որոնք փոխադարձ հետաքրքրություն են ներկայացնում: Նախարարի կարծիքով՝ հաշվի առնելով բանկային ոլորտում Լյուքսեմբուրգի փորձը՝ օգտակար կլիներ բիզնես համաժողովի անցկացումը: Նալբանդյանը նշեց Երեւանում Ֆրանկոֆոնիայի գագաթնաժողովի անցկացման կարեւորությունը եւ Լյուքսեմբուրգին ու անձամբ Ժան Ասելբորնին շնորհակալություն հայտնեց Հայաստանի մայրաքաղաքում գագաթնաժողովի անցկացման որոշմանն օժանդակելու համար:
Հայաստանի ԱԳ նախարարը գործընկերոջը ներկայացրեց Հայաստանի եւ ԵԱՀԿ ՄԽ համանախագահների ջանքերն ուղղված Լեռնային Ղարաբաղի հակամարտության խաղաղ ճանապարհով կարգավորմանը:
