Կեմերովոյի կենտրոնական հրապարակում, որտեղ այժմ ընթանում է քաղաքացիների մասնակցությամբ տարերային հանրահավաքը, ոստիկանության աշխատակիցների թիվն ավելացել է մոտ տասն անգամ: Այս մասին երեքշաբթի օրը՝ մարտի 27-ին,«Գովորիտ Մոսկվա» ռադիոկայանին հայտնել է Իգոր Վոստրիկովը, որը «Զիմնյայա վիշնյա» առեւտրի կենտրոնում տեղի ունեցած հրդեհի հետեւանքով կորցրել է իր ընտանիքին, փոխանցում է «Լենտա»-ն:
Նա հավելել է, որ ակցիայի անկացման վայրում որեւէ միջադեպ չի ծագել: «Մենք նպատակ ունենք, մենք ինչ-որ ընդդիմություն չենք, որը եկել է ամեն կերպ իշխանությունը տապալելու: Մենք վշտից սպանված մարդիկ ենք, որ եկել են ճշմարտությունը գտնելու, սակայն՝ սթափ գիտակցությամբ»,- նշել է ռադիոկայանի զրուցակիցը:
Մարտի 27-ին Կեմերովոյի բնակիչները հանրահավաքի են դուրս եկել քաղաքի կենտրոնական հրապարակում՝ պաշտոնյաներից պահանջելով պատմել ճշմարտությունն առեւտրի կենտրոնում տեղի ունեցած հրդեհի մասին: Նրանք նաեւ պահանջում են նահանգապետ Աման Տուլեեւի հրաժարականը: Իսկզբանե հանրահավաքին մոտ 300 մարդ էր մասնակցում, սակայն հետո ցուցարարների թիվը մի քանի հազարի հասավ: Այդպես, «Գովորիտ Մոսկվա»-ի տվյալներով՝ ակցիային ավելի քան 4 հազար մարդ է մասնակցել:
«Զիմնյայա վիշնյա» առեւտրի կենտրոնում հրդեհը բռնկվել էր մարտի 25-ին: Զոհվել է 64 մարդ, այդ թվում՝ 41 երեխա: Ռուսաստանի Քննչական կոմիտեն քրեական գործ է հարուցել երեք հոդվածի հիման վրա: Մի քանի մարդ ձերբակալվել է: Գերատեսչության ղեկավար Ալեքսանդր Բաստրիկինը հայտարարել է, որ առեւտրի կենտրոնում հրդեհի ամենահավանական պատճառը էլեկտրալարերի կարճ միացումն է: