ԱՄՆ նախագահ Դոնալդ Թրամփը «Սկրիպալի գործը» քննարկել է Գերմանիայի կանցլեր Անգելա Մերկելի եւ Ֆրանսիայի նախագահ Էմանուել Մակրոնի հետ հեռախոսազրույցներում:
Սպիտակ տան հաղորդմամբ՝ զրույցի ընթացքում Թրամփը, Մերկելը եւ Մակրոնը բարձր են գնահատել Արեւմուտքի, ՆԱՏՕ-ի, Եվրամիության եւ այլ դաշնակիցների վճռական արձագանքը եւ «չհայտարարված ռուսական հետախույզներին» արտաքսելու իրենց որոշումը` ի պատասխան «Ռուսաստանի կողմից քիմիական զենքի անխոհեմ օգտագործմանը»:
Մերկելի հետ զրույցի ընթացքում քննարկվել է «Չինաստանի անբարեխիղճ տնտեսական գործելակերպին եւ մտավոր սեփականության ապօրինի ձեռքբերմանը» հակազդելուն միանալու հարցը:
Մակրոնի հետ զրույցում Թրամփը ընդգծել է Թուրքիայի հետ համագործակցության խորացման անհրաժեշտությունը Սիրիայում ընդհանուր ռազմավարական խնդիրների համատեքստում: Երկու ղեկավարները քննարկել են նաեւ Միացյալ Նահանգների եւ Եվրամիության միջեւ առեւտրային գործելակերպը եւ Չինաստանի «անարդար առեւտրային գործելակերպի» հետ կապված քայլերը:
