Փրկարարները հայտնաբերել են Կեմերովոյի «Զիմնյայա վիշնյա» առեւտրի կենտրոնում հրդեհի հետեւանքով բոլոր 64 զոհերի դիերը: Զոհերից 41-ը երեխաներ են: Միաժամանակ, սոցցանցերում տեղեկություններ են տարածվել 300-400 զոհի մասին, սակայն այս լուրերը չեն հաստատվել: Հրդեհի հետեւանքով տուժածները նաեւ շտաբ են ստեղծել, 85 անհետ կորածի տվյալներ են հավաքագրել, որոնք պատրաստվում են փոխանցել իրավապահներին: Կեմերովոյում վաղ առավոտից հանրահավաք է: Քաղաքի բնակիչները պատրաստվում են փողոցում գիշերել:
Այսօր առավոտյան Կեմերովո է մեկնել նաեւ Ռուսաստանի նախագահը: Վլադիմիր Պուտինը հարգանքի տուրք է մատուցել զոհվածների հիշատակին, իսկ հետո արտակարգ խորհրդակցություն անցկացրել: Հրդեհի փաստով հարուցված քրեական գործով ձերբակալվածներ կան, իսկ «Զիմնյայա վիշնյա» առեւտրի կենտրոնի տեխնիկական գծով տնօրեն Գեորգի Սոբոլեւին մեղադրանք է առաջադրվել:
Ողբերգության ականատեսները պատմել են, որ հրդեհի ազդանշան չի հնչել, մարդկանց տարհանում չի կազմակերպվել: Արդյունքում առեւտրի կենտրոնում գտնվողները խուճապի են մատնվել, հրմշտոց է առաջացել: Ոմանք շենքից դուրս պրծնելու համար պատուհաններից են նետվել: Իսկ այսօր հայտնի է դարձել, որ առեւտրի կենտրոնում հրդեհի ազդանշանային համակարգն անսարք է եղել դեռեւս մարտի 19-ից, սակայն ոչ ոք դրանով չի զբաղվել: Ողբերգության կապակցությամբ Կեմերովոյի շրջանում եռօրյա սուգ է հայտարարվել:
Ռուսաստանում ավտովթարի հետեւանքով երկու հայ է զոհվել: Դեպքը տեղի է ունեցել Սարատովի մարզում. 27-ամյա Արմեն Ղազարյանը «ՎԱԶ-21» մակնիշի մեքենայով բախվել է «ԿամԱԶ»-ին: Նախնական տվյալներով՝ նա կորցրել է մեքենայի կառավարումը, դուրս է եկել ճանապարհի հանդիպակաց հատված ու բախվել բեռնատարին: Պատահարի հետեւանքով Արմեն Ղազարյանը, ինչպես նաեւ «ՎԱԶ-21»-ի ուղեւորը՝ 28-ամյա Սերյոժա Հարությունյանը, մահացել են:
Տարբեր երկրներից արտաքսված ռուսաստանցի դիվանագետների թիվը հասել է 139-ի: «Սկրիպալի գործի» հետ կապված Մեծ Բրիտանիային այդ կերպ «համերաշխություն» է հայտնել արդեն 24 երկիր: Եվրամիության անդամ պետությունների տարածքից արտաքսվել է 33 դիվանագետ, ԱՄՆ-ից՝ 60, Մեծ Բրիտանիայից՝ 23: Նման որոշումներ են կայացրել նաեւ ՆԱՏՕ-ն, Կանադայի, Ուկրաինայի եւ Ավստրալիայի կառավարությունները:
Հիշեցնենք, որ ռուս նախկին լրտես Սերգեյ Սկրիպալը եւ նրա դուստրը թունավորվել են մարտի 4-ին, անգլիական Սոլսբերի քաղաքի առեւտրի կենտրոններից մեկում: Նրանք ծայրահեղ ծանր վիճակում հիվանդանոցում են: Սկրիպալներին թունավորելու համար Մեծ Բրիտանիան Ռուսաստանին է մեղադրում: Մոսկվան շարունակում է հերքել մեղադրանքը՝ խոստոնալով իր դիվանագետների արտաքսմանը պատասխան քայլեր ձեռնարկել:
Սոցցանցերում մեծ հնչեղություն է ստացել Ասյա Խաչատրյանի մասին լրատվամիջոցներից մեկի հրապարակումը: Ասյան Հայաստանի քաղաքացի է, տարեսկզբից ապրում եւ աշխատում է Ստեփանակերտում: Աղջիկը պնդում է, որ փետրվարից Արցախի իրավապահները ֆիզիկապես եւ հոգեբանորեն ճնշում են իրեն, իսկ պատճառը, նրա հավաստմամբ, մազերը կապույտ ներկելն ու փողոցում ծխելն է: Ասյան պատմել է նաեւ, որ փետրվարի 1-ին ուշ երեկոյան փողոցում զբոսնելիս երեք ոստիկաններ կանգնեցրել են իրեն, անձնագիր պահանջել, հետո նաեւ ոստիկանություն կանչել: Արցախի ՄԻՊ գրասենյակն այսօր հայտարարություն է տարածել՝ նշելով, որ հետեւողական են լինելու՝ Արցախի ոստիկանության կողմից իր նկատմամբ ապօրինություններ կատարելու մասին Ասյա Խաչատրյանի պնդումներին պատշաճ իրավական արձագանք ապահովելու հարցում:
Ֆուտբոլի Հայաստանի եւ Լիտվայի հավաքականների ընկերական հանդիպման արդյունքը՝ 0:1: Հյուրերը հաշիվը բացեցին առաջին խաղակեսի վերջին րոպեին. Հայաստանի հավաքականի դարպասը գրավեց Լիտվայի «Սուդուվա» ակումբի 24-ամյա կիսապաշտպան Օվիդիուս Վերբիցկասը: Երկրորդ խաղակեսում արդեն հաշիվն անփոփոխ մնաց: Նշենք, որ Հայաստան-Լիտվա հանդիպումը սպասարկում էր Վրաստանը ներկայացնող մրցավարական թիմը՝ Իրակլի Կվիրիկաշվիլիի գլխավորությամբ: Հավելենք նաեւ, որ ՖԻՖԱ-ի դասակարգման աղյուսակում Հայաստանը 91-րդ տեղում է, իսկ Լիտվան 147-րդն է: Իսկ մեր հավաքականի ընկերական նախորդ՝ մարտի 24-ին Էստոնիայի հավաքականի հետ կայացած խաղն ավարտվել էր գոլազուրկ ոչ ոքիով, լիտվացիներն էլ Թբիլիսիում 0:4 հաշվով պարտվել էին Վրաստանի հավաքականին:
Լեւոն Արոնյանը դուրս մնաց Շախմատի աշխարհի չեմպիոնի կոչման համար պայքարից: Բեռլինում ավարտին մոտեցող աշխարհի չեմպիոնի հավակնորդների մրցաշարի վերջին տուրում Արոնյանի մրցակիցն ԱՄՆ-ն ներկայացնող Ուեսլի Սոն էր. խաղը ոչ ոքի է ավարտվել: Նախորդ 13 տուրերում հայ գրոսմայստերը մեկ հաղթանակ է տարել, 6 պարտություն կրել, 6 պարտիա էլ ավարտել է ոչ ոքի: Արդյունքում նա 4.5 միավորով վերջին հորիզոնականում է: Իսկ չեմպիոնի հավակնորդների մրցաշարի հաղթողն իրավունք կստանա նոյեմբերի 9-28-ը Լոնդոնում կայանալիք մրցամարտում աշխարհի գործող չեմպիոն, նորվեգացի Մագնուս Կարլսենի հետ վիճարկել համաշխարհային թագը:
Մարտի 27-ին դոլարը փոքր-ինչ էժանացել է, եվրոն՝ թանկացել: Դոլարի փոխարժեքը կազմել է 480 դրամ, եվրոյինը՝ 596, ռուբլունը՝ 8 դրամ 41 լումա, ֆունտինը՝ 678 դրամ:
Մարտի 28-ին հանրապետությունում սպասվում է առանց տեղումների եղանակ: Օդի ջերմաստիճանը 2-3 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +8+10, ցերեկը՝ +21+23 աստիճան տաքություն:
