ԱՄՆ-ի Օդագնացության եւ տիեզերականտարածության հետազոտման ազգային վարչությունը (NASA) հերթական անգամ հետաձգել է James Webb նոր աստղադիտակի դուրսբերումն ուղեծիր: Այժմ, ինչպես երեքշաբթի օրը հայտարարեց գերատեսչության ղեկավարի պաշտոնակատար Ռոբերտ Լայֆուտը, աստղադիտարանը նախատեսված է տիեզերք ուղարկել 2020 վականին մայիսին՝ նախատեսվածից մեկ տարի ավելի ուշ, փոխանցում է «ՏԱՍՍ»-ը:
«Աստղադիտակի բոլոր հիմնական կոմպոնենտների վրա աշխատանքներն ավարտվել են, սակայն դրանց փորձարկման ընթացքում հայտնաբերված որոշ խնդիրները ստիպում են մեզ վերանայել գործարկման ժամկետները»,- ասել է նա NASA-ի կենտրոնակայանում կայացած մամուլի ասուլիսի ժամանակ, որը հեռարձակվել է գործակալության կայքում:
NASA-ի տնօրենի օգնական Թոմաս Զուրբուկենի խոսքով՝ աստղադիտարանի հեղինակները «թերագնահատել են այդ նախագծի տեխնոլոգիական բարդությունը»: «Առանձին բաղադրիչների հավաքման եւ փորձարկման գործընթացն ավելի երկար ժամանակ խլեց, քան ակնկալվում էր», - բացատրեց նա: Բացի այդ, թենիսի դաշտի մեծության բացառիկ արեւապաշտպանիչ էկրանի աշխատունակությունը ստուգելիս պոլիամիդ ժապավենի մեջ 10 սմ երկարությամբ ճեղքեր են հայտնաբերվել:
Լայֆուտը անհրաժեշտ համարեց ուշադրություն հրավիրել այն հանգամանքի վրա, որ լրացուցիչ փորձարկումները եւ գործարկման հետաձգումը կարող են հանգեցնել նախագծի արժեքի բարձրացմանը: ԱՄՆ Կոնգրեսը 2001 թվականին սահմանել էր աստղադիտակի ստեղծման եւ գործարկման ծախսերի նշաձողը 8 միլիարդի չափով: NASA-ն նախագծի իրականացման համար արդեն իսկ 7.3 միլիարդ դոլար է ներդրել:
