Այս տարի Ռուսաստանը Հայաստանին զենք կմատակարարի 100 միլիոն դոլարի նոր պաշտպանական վարկի շրջանակում: Այս մասին հինգշաբթի օրը ArmHiTech-2018 ցուցահանդեսի ժամանակ լրագրողներին հայտնեց Ռազմատեխնիկական համագործակցության դաշնային ծառայության փոխտնօրեն Վլադիմիր Դրոժժովը, փոխանցում է «ՌԻԱ Նովոստի»-ն: «Մատակարարումը նախատեսված է 2018 թվականի համար»,- նշել է նա՝ պատասխանելով թղթակցի համապատասխան հարցին:

Անցյալ տարվա դեկտեմբերին ՀՀ նախագահ Սերժ Սարգսյանը ստորագրել էր 15 տարի մարման ժամկետով 100 միլիոն դոլարի ռուսական պաշտպանական վարկի վերաբերյալ համաձայնագրի վավերացման մասին օրենքը: Բացի այդ, 2015 թվականի հունիսին համաձայնագիր է ստորագրվել ռուսական արտադրության ռազմական արտադրանքների ձեռքբերման համար Ռուսաստանի կողմից Հայաստանին 200 միլիոն դոլարի պետական արտահանման վարկ տրամադրելու մասին: Այս վարկի շրջանակներում, ինչպես հայտնել են ՀՀ ՊՆ-ում, 18 պայմանագիր է կնքվել:

Ինչպես հայտարարել էր Հայաստանի պաշտպանության նախարար Վիգեն Սարգսյանը, նոր ռուսական պաշտպանական վարկի շրջանակում Երեւանը մտադիր է Մոսկվայից «ռազմավարական զսպման» զենք ձեռք բերել: