Մարտի 29-ին, ժամը 22:25-ին ահազանգ է ստացվել, որ Շիրակի մարզի Գյումրի քաղաքում՝ Խ. Հայրիկի փողոցի սկզբնամասում, տեղի է ունեցել ՃՏՊ. կան տուժածներ. անհրաժեշտ է փրկարարների օգնությունը:

Դեպքի վայր է մեկնել մեկ մարտական հաշվարկ:

Պարզվել է, որ բախվել են  «ՎԱԶ 2101» մակնիշի 34 PA 712 պետհամարանիշի (վարորդ՝ ծնված 1988 թ. Ա. Ա. ) եւ «Opel Astra G» մակնիշի 35 QV 710 պետհամարանիշի (վարորդ՝ 1983 թ. ծնված Վ. Ք.) ավտոմեքենաները, ինչի հետեւանքով Ա. Ա.-ը ստացած մարմնական վնասվածքներից տեղում մահացել է, իսկ «Opel»-ի վարորդը եւ ուղեւորներ՝ 1984 թ. ծնված Ա. Ք.-ը եւ 2001 թ. ծնված Ա. Շ.-ը տարբեր աստիճանի մարմնական վնասվածքներով հոսպիտալացվել են «Ավստրիական մանկական հիվանդանոց», որտեղ բժիշկները տուժածների առողջական վիճակը գնահատել են բավարար:

Փրկարարներն Ա. Ա.-ի դին դուրս են բերել արգելափակումից, հոսանքազրկել ավտոմեքենաները, դադարեցրել վառելիքի արտահոսքը եւ սահմանազատել տարածքը: