Ֆրանսիայի Եվրոպայի եւ Արտաքին գործերի նախարարին առընթեր պետքարտուղար Ժան-Բատիստ Լըմուանը այսօր՝ մարտի 30-ի առավոտյան այցելել է Ծիծեռնակաբերդի հուշահամալիր: Այս մասին հաղորդում է NEWS.am–ի թղթակիցը։
Հյուրին ուղեկցում էին նրա կողմից գլխավորած պատվիրակության անդամները, Հայոց ցեղասպանության թանգարան – ինստիտուտի տնօրենի պաշտոնակատար Գեւորգ Վարդանյանը:
Պատվիրակությունը ծաղկեպսակ է դրել Հայոց ցեղասպանության զոհերի հուշարձանին եւ ծաղիկներ խոնարհել Հայոց ցեղասպանության սուրբ նահատակների հիշատակը հավերժացնող անմար կրակի մոտ, ինչպես նաեւ մեկ րոպե լռությամբ հարգել Հայոց Ցեղասպանության զոհերի հիշատակը։
Այնուհետեւ պատվիրակության անդամներն այցելել են Հայոց ցեղասպանության թանգարան – ինստիտուտ:
Նշենք, որ այցի ընթացքում Ժան-Բատիստ Լըմուանին կընդունեն նախագահ Սերժ Սարգսյանը եւ արտգործնախարար Էդվարդ Նալբանդյանը:
Այսօր Ժան-Բատիստ Լըմուանը կայցելի Ֆրանսիական դպրոց (Նար- Դոսի փող., 2 շենք.) եւ կբացի դպրոցի նոր անունը պարգեւող վահանակը, որից հետո դպրոցը կկոչվի Անատոլ Ֆրանսի անունով՝ ի պատիվ հայկական հարցի մեծ ջատագով եւ ֆրանս֊հայկական բարեկամության խորհրդանիշ ՝ֆրանսիացի հայտնի գրողի։