Երեւանի քաղաքապետարանը շարունակում է իրականացնել բացօթյա առեւտրի արգելման եւ կանխարգելման լայնամասշտաբ ծրագիր։
Քաղաքապետարանից NEWS.am-ին հայտնում են, որ այդ ծրագրի նպատակն է ի կատար ածել ՀՀ օրենսդրության պահանջը, սպառողներին ապահովագրել անորակ, պահպանման անբավարար պայմաններում վաճառվող մթերքի օգտագործումից, կանխել եւ հետագայում բացառել դրանց արդյունքում արձանագրված թունավորման դեպքերը:
«Պակաս կարեւոր չեն նաեւ մայթերի, անցուղիների, մինչեւ իսկ փողոցների երթեւեկելի մասերի խցանումներից ձերբազատումը, տարերայնորեն կազմակերպված վաճառատների հարակից տարածքների հակասանիտարական վիճակի, բնակելի շենքերի մուտքերի եւ պատուհանների մոտ աղմուկի վերացումը, ինչը արդարացիորեն մշտապես առաջացնում է բնակիչների անհանգստությունը եւ դժգոհությունը»,- նշված է հաղորդագրությունում:
Ըստ այդմ, բացօթյա առեւտրի կազմակերպում թույլատրվում է միայն ծաղիկների, տնկիների, ամանորյա տոնակատարությունների համար նախատեսված եղեւնիների եւ սոճիների, պաղպաղակի, ջրի, այդ թվում՝ հյութերի, հանքային եւ զովացուցիչ ըմպելիքների վաճառքի դեպքերում, եւ անօրինական բացօթյա առեւտրի արգելումը լիովին համահունչ է ե՛ւ օրենսդրության պահանջներին, ե՛ւ սպառողների շահերին:
«Անօրինական առեւտրով ներկայումս զբաղվողներին առաջարկվում է տեղափոխվել մոտակա շուկաներ, բացի այդ, մշակման եւ համաձայնեցման փուլում է նոր մինի շուկաների կազմակերպման ծրագիրը, ինչը հնարավորություն կտա ունենալ եւ՛ քաղաքակիրթ առեւտուր, եւ՛ բացօթյա առեւտրով զբաղվող անձանց սոցիալական կեցության պահպանման հնարավորություն։ Մենք այս հարցում ակնկալում ենք եւ՛ բացօթյա առեւտրով զբաղվողների, եւ՛ բոլոր սպառողների աջակցությունը, որովհետեւ խնդրի արմատական լուծումը հնարավոր է միայն շահագրգռել բոլոր կողմերի սրտացավ եւ ողջախոհ մասնակցությամբ»,- ասված է քաղաքապետարանի տարածած հաղորդագրության մեջ: