Մարտի 30-ին Նյու Յորքում բացվել է ամենամյա միջազգային ավտոսրահը: Կազմակերպիչները նշում են, որ Jacob Javits Convention Center-ում ցուցահանդեսում մոտ հազար ավտոմեքենա է ցուցադրված, որոնցից ավելի քան 20-ը առաջին անգամ են ներկայացվում, հաղորդում է ՏԱՍՍ-ը:
Նոր մոդելների թվում են Toyota-ի, Subaru-ի, Volkswagen-ի, Acura-ի եւ Cadillac-ի ամենագնացներն ու քրսովերները: Մասնավորապես լրագրողների եւ փորձագետների ուշադրությունը գրավել է Toyota-ի հինգերորդ սերնդի RAV4 մեքենան: Արտադրողների հավաստմամբ՝ այս կոմպակտ քրոսովերը նախկին մոդելներից տարբերվում է կառավարման հարմարությամբ: ԱՄՆ-ում անցյալ տարի վաճառվել է ավելի քան 400 հազար RAV4:
Բացի այդ, նորույթների թվում են ընդգրկել լյուքս դասի ձեւափոխված քրոսովերնեը՝ Acura RDX-ը եւ Cadillac XT4-ը: Առաջին մեքենան, ինչպես նշում են արտադրողները, հագեցած է մասնավորապես անվտանգության լրացուցիչ համակարգերով: Երկրորդի սրահը առանձնանում է բարձր հարմարավետությամբ:
LMC Automotive խորհրդատվական ընկերության գնահատականներով՝ ԱՄՆ-ում թե սովորական սպառողների համար նախատեսված, թե պրեմիում դասի ամենագնացների ու քրսովերների վաճառքը 2010-ից կրկնապատկվել է: Ըստ ընկերության կանխատեսումների՝ այս աճը կդանդաղի, բայց կշարունակվի մինչեւ առնվազն 2025 թվականը:
Նյու Յորքի միջազգային ավտոսրահը համարվում է ԱՄՆ-ում ավտոմոբիլաշինարարական կորպորացիաների նվաճումների ամենահեղինակավորներից ցուցահանդեսներից մեկը: Այն անցկացվում է ամեն տարի 1900 թվականից: Ակնկալվում է, որ այս տարի միջոցառմանը կմասնակցի շուրջ մեկ միլիոն մարդ: Ավտոսրահը բաց կլինի մինչեւ ապրիլի 8-ը: