Հայաստանում ԱՄՆ դեսպանատան Արտահանման վերահսկողության եւ սահմանների անվտանգության (EXBS) ծրագիրը վերջերս Նյու Յորքի Ջոն Քենեդու անվան միջազգային օդանավակայանում կազմակերպել է աշխատաժողով ՀՀ մաքսային ծառայության 17 աշխատակիցների համար:
Այս առնչությամբ, դեսպանատան Facebook-ի էջում նշվում է. «Դասընթացը հնարավորություն է ընձեռել Հայաստանի մաքսային աշխատակիցներն՝ Միացյալ Նահանգների մաքսային եւ սահմանների պաշտպանության աշխատակիցների հետ քննարկել ընդհանուր մարտահրավերները եւ սովորել մաքսանենգ ապրանքների հայտնաբերման, բացահայտման ու արգելման նոր ուղիները:
Նրանք ուշադրություն են դարձրել այնպիսի ոլորտների վրա, ինչպիսիք են հասցեականությունը, տեխնոլոգիաների կիրառումը բազմաշերտ հսկողության ժամանակ եւ ինքնաթիռների խուզարկությունը:
EXBS ծրագրի նպատակն է ամրապնդել արտահանման վերահսկման համակարգերը ողջ աշխարհում՝ ապահովելով իրավական խորհրդատվություն, ուսուցում եւ սարքավորումներ: Արտահանումների նկատմամբ ավելի լավ վերահսկողությունն օգնում է պայքարել զանգվածային ոչնչացման զենքի տարածման, դրանց մատակարարման համակարգերի, սովորական սպառազինությունների եւ հարակից նյութերի դեմ:
