«Բուրգեր Քինգում» պայթյունից տուժած ութամյա աղջկա՝ Ռուբինա Մարկոսյանի կյանքին վտանգ չի սպառնում։ Այդ մասին լրագրողներին հայտնել է «Սուրբ Գրիգոր Լուսավորիչ» հիվանդանոցի վերակենդանացման բաժանմունքի վարիչ Սամվել Կարապետյանը։
Նրա խոսքով, վիրահատությունը դեռ չի ավարտվել, սակայն արդեն կարելի է ասել, որ նրա կյանքին վտանգ չի սպառնում։ Երեխան ազդրի հատվածում մեծ պատռված վերքեր էր ստացել, վիրահատվում է։
Հարցին, արդյոք հետագայում բարդացումներ հնարավոր են, թե ոչ, նա պատասխանել է, որ բոլոր հարցերին հնարավոր կլինի պատասխանել վիրահատության ավարտից հետո։
Սամվել Կարապետյանի խոսքով, մյուս վիրավորների վիճակը բավարար է, նույնիսկ երեք-չորս հոգի պատրաստվում են, որ դուրս գրվեն։
Նշենք, որ ապրիլի 2-ին, ժամը 20:44-ին Հյուսիսային պողոտայի թիվ 5 հասցեում գտնվող «Բուրգեր Քինգ» արագ սննդի կետում պայթել է լցնովի գարեջրի ճնշումն ապահովող բալոնը, կա 8 տուժած, (այդ թվում օտարերկրյա քաղաքացիներ) ովքեր տեղափոխվել են «Սուրբ Գրիգոր Լուսավորիչ» ԲԿ:
Վիրավորվել էին Ռուդոլֆ Մարկոսյան (6 տարեկան), Ռուբինա Մարկոսյան (8 տարեկան), Զարուհի Մելիքյան (19 տարեկան), Էրիկ Աշուղյան (24 տարեկան, ԻԻՀ քաղաքացի), Ալյոնա Ագապովա (15 տարեկան, ՌԴ քաղաքացի), Լիզա Աբրահամովա (15 տարեկան, ՌԴ քաղաքացի), Յարոսլավ Լյուբենկո (15 տարեկան, ՌԴ քաղաքացի), Զեյնա Հուսեինի (24 տարեկան, ԻԻՀ քաղաքացի):