Հայաստանում 2017 թվականին արձանագրվել է երեխաների նկատմամբ սեռական բնույթի հանցագործության 101 դեպք։ Այս մասին ապրիլի 5-ին՝ մամուլի ասուլիսի ժամանակ հայտարարել է Քննչական կոմիտեի իրավական ապահովման եւ վիճակագրության վարչության պետ Դավիթ Թումասյանը։
Նրա խոսքով, 2015 թվականին Քննչական կոմիտեն քննել է սեռական բնույթի հանցագործության հատկանիշներով 131 դեպք, որոնցից 84-ը՝ երեխաների նկատմամբ։ 2016 թվականին քննվել է սեռական բնույթի հանցագործության հատկանիշներով 131 դեպք, որոնցից որոնցից 110-ը՝ երեխաների նկատմամբ։ 2017 թվականին գրանցված սեռական հանցագործությունների վերաբերյալ քննված գործերի 161 դեպքից 101-ը կատարվել է երեխաների նկատմամբ:
Անդրադառնալով տուժողների թվին՝ Դավիթ Թումասյանը նշել է, որ 2015 թվականին 142 տուժողներից 76 երեխաներ են եղել, 2016 թվականին 162-ից 115–ն են երեխաներ եղել, իսկ 2017 թվականին՝ 166-ից 103–ը։ Տուժողներից ամենափոքրը 4-5 տարեկան է եղել։ Ամենամեծ թիվը տուժողների թվում 14-16 տարեկան խմբում է եղել։