ՀՀ վարչապետն ունենալու է երկու նստավայր։ Այս մասին այսօր՝ ապրիլի 5-ին, կառավարության նիստից հետո լրագրողների հետ ճեպազրույցում ասել է արադարադատության նախարար Դավիթ Հարությունյանը։
«Գործող վարչապետի հնարավորություններն այն աստիճանի են ընդլայնված, որ գործող նախագահի լիազորությունների զգալի մասն իրականացվելու է վարչապետի կողմից , այսինքն՝ զուտ կառուցվածքային ու ենթակառուցվածքային առումով նախագահի նստավայրի շենքը այդ առումով հարմարեցված է մի շարք լիազորությունների պատշաճ իրականացման համար»,–ասել է նախարարը:
Ըստ Դավիթ Հարությունյանի՝ վարչապետի ներկայիս նստավայրը հարմարեցված է գործադիր իշխանության ոլորտում լիազորություններ իրականացնելու համար։ «Կարծում եմ՝ զարմանալի բան չկա, որ լիազորությունների մի մասն էլ իրականացվելու է այլ տարածքից։ Վարչապետը ունենալու է այս շենքում նստավայր։ Կառավարության անդամների հետ աշխատանքը կարող է իրականացվել այստեղ»,–նշել է նա։
Նշենք, որ ըստ օրենսդրական կարգավորումների ՀՀ վարչապետի նստավայր է համարվելու Բաղրամյան 26-ը:
