ԱՄՆ Օհայո նահանգի բնակիչները դիմել են ոստիկանություն՝ հայտնելով զոմբի ջրարջերի ներխուժման մասին, հաղորդում է «Լենտա»՝ վկայակոչելով WKBN 27 լրատվական պորտալը:
Յանգստոն քաղաքի ոստիկանները նշել են, որ վերջին երեք շաբաթվա ընթացքում նրանք 14 բողոք են ստացել ջրարջերի տարօրինակ պահվածքի մասին. կենդանիները մտել են տների բակերը եւ, ըստ սարսափած բնակիչների, «պահել են իրենց զոմբիների նման»: Նրանցից մեկը նկարագրել է միջադեպը հետեւյալ կերպ. «Նա կանգնել էր հետեւի թաթերի վրա, իսկ ես երբեք չեմ տեսել, որպեսզի ջրարջերը այդպես կանգնեն, ապա բացեց ատամները եւ կրկին ընկավ՝ կարծես կոմայի մեջ: Տղամարդը, թափահարելով ձեռքերը, փորձել է վախեցնել կենդանուն բարձր ձայներով, սակայն ջրարջը կանգնել է եւ կրկին ընկել, ինչից հետո նա ոստիկանություն է կանչել: Կենդանուն տարել եւ քնեցրել են, ինչպես եւ մնացած 13 ջրարջերին:
Օհայո նահանգի բնական ռեսուրսների դեպարտամենտի ներկայացուցիչները նշել են, որ ախտանիշները կատաղահարության նման չեն: Ըստ նրանց՝ կենդանիները հավանաբար տառապում են շների ժանտախտով, որը մարդկանց համար վտանգ չի ներկայացնում: