ԱՄՆ Միջազգային զարգացման գործակալությունը (USAID) 10.7 մլն դոլարով կլրացնի Հայաստանին տրամադրվող դրամաշնորհը։ Համապատասխան լրացումը կառավարության ապրիլի 5-ի նիստի որոշմամբ կկատարվի ԱՄՆ–ի եւ ՀՀ–ի միջեւ կնքված «Ավելի մրցունակ եւ զանազանեցված մասնավոր հատվածի շուրջ» օժանդակության դրամաշնորհային համաձայնագրում։ Որոշման նախագիծը ներկայացրել է տնտեսական զարգացման եւ ներդրումների նախարար Սուրեն Կարայանը։
2010 թվականի օգոստոսի 6-ին կնքված համաձայնագրով նախատեսվում էր Հայաստանին տրամադրել 62.6 մլն դոլարի չափով դրամաշնորհ։ Դրամաշնորհի լրացված տարբերակով դրամաշնորհը կկազմի 73.2 մլն դոլար։ Միաժամանակ, համաձայնագրի գործողության ժամկետը երկարացվել է 1 տարով եւ կավարտվի 2020 թվականի սեպտեմբերի 30–ին՝ նախկին 2019 թվականի սեպտեմբերի 30–ի փոխարեն։
