«Արժանապատիվ ազատամարտիկ» ՀԿ նախագահ, պահեստազորի գնդապետ Վոլոդյա Ավետիսյանն ու իր ընկերները իշխանությունների հեռանալու պահանջով շարունակելու են նստացույցն այնքան ժամանակ, մինչեւ մնացած ուժերն էլ գան Ազատության հրապարակ: NEWS.am-ի հետ զրույցում այս մասին ասաց Վոլոդյա Ավետիսյանը:

«Իմ նպատակն է, որ բոլոր ուժերը միավորվեն, հատուկ դրա համար շարունակում եմ նստացույցը, կոչեր եմ հնչեցնում: Ռեժիմի դեմ պայքարող մյուս ուժերը, եթե իրոք ընդդիմադիր են, ապա բոլորիս նպատակը նույն է` Սերժ Սարգսյանի եւ ռեժիմի հեռացումը, որպեսզի կարողանանք մեր պետությունը փրկենք»,-ասաց Վոլոդյա Ավետիսյանը` հավելելով, որ իրենք պատրաստ են այլ ուժերի հետ համատեղ պայքարել` իշխանությունների հեռանալու պահանջով:

Նշենք, որ Վոլոդյա  Ավետիսյանն իր աջակիցների հետ արդեն 17-րդ օրն է, ինչ նստացույց է անում Ազատության հրապարակում:

Վոլոդյա Ավետիսյանը հավելեց, որ իրենց շարունակում են հետեւել, իսկ նստացույցի մասնակիցներից Արսեն Ավետիսյանի դեմ 2013 թվականին հարուցված եւ կասեցված քրեական գործը վերաբացել են, ամենայն հավանականությամբ, նրա նկատմամբ ճնշում կիրառելու նպատակով:

Նստացույցի մասնակիցները  պարզել են պաստառներ, որոնց վրա գրված է. «Թույլ չենք տա Սերժ Սարգսյանի վարչապետացումը», «Հայաստանն առանց քաղբանտարկյալների»: Պաստառներից մեկի վրա էլ գրված են «Սեֆիլյանի եւ մյուսների» գործով ամբաստանյալների անուններն ու դատարանի կողմից տրված պատժի չափը:

Հիշեցնենք, որ Վոլոդյա Ավետիսյանը 2013թ. սեպեմբերին կալանավորվել եւ 2014-ի ամռանը 6 տարվա ազատազարկման է դատապարտվել, իսկ 2017-ի մայիսին ազատ է արձակվել համաներման արդյունքում: Նա դատապարտվել է խարդախության համար:

Վոլոդյա Ավետիսյանն արցախյան ազատամարտի մասնակից է, եղել է Լեոնիդ Ազգալդյանի աջ ձեռքը:

Նշենք, որ ապրիլի 9-ին ավարտվում է Սերժ Սարգսյանի լիազորությունների երկրորդ ժամկետը, իսկ վարչապետի ընտրությունը տեղի է ունենալու ապրիլի 17-ին, ԱԺ հատուկ նիստում։ Թեեւ ՀՀկ-ն դեռեւս չի հայտարարել, թե ով է վարչապետի իր թեկնածուն, սակայն ամենայն հավանականությամբ հենց Սերժ Սարգսյանը կլինի ՀՀԿ-ի թեկնածուն։