Ադրբեջանի հետ բանակցություններ են ընթանում համապարփակ համագործակցության համաձայնագրի ստորագրման շուրջ: Այս մասին ապրիլի 9-ին լրագրողների հետ զրույցում հայտնել է ՀՀ-ում Եվրամիության պատվիրակության ղեկավար, Հայաստանում ԵՄ դեսպան Պյոտր Սվիտալսկին: Ընդ որում, նա հավելել է, որ այս փուլում չի կարող կանխագուշակել, թե հետագայում ինչպիսի ընթացք կստանան այդ հարցի շուրջ բանակցությունները:
Խոսելով ղարաբաղյան խնդրի կարգավորման մասին՝ դեսպանը նշել է, որ Լեռնային Ղարաբաղի հակամարտության կարգավորման վերաբերյալ ԵՄ դիրքորոշումը կայանում է ԵԱՀԿ Մինսկի խմբի ջանքերին աջակցելու մեջ: «Մենք կողմ ենք այս հակամարտության բացառապես խաղաղ կարգավորմանը, եւ Ադրբեջանի հետ այս համաձայնագիրը հակամարտության լուծման համար որեւէ մեխանիզմ չի պարունակում»,- պարզաբանեց Սվիտալսկին:
Սվիտալսկին նշել է, որ Հայաստանի եւ Եվրամիության միջեւ համապարփակ եւ ընդլայնված համագործակցության մասին համաձայնագիրը արտացոլում է ԵՄ անդամ պետությունների դիրքերը եւ նրանք աշխատում են Հայաստանի հետ՝ այդ համաձայնագրի վավերացման համար: «Մենք կարծում ենք, որ արող ենք օգնել Հայաստանին իրականացնել անհրաժեշտ բարեփոխումները: Մենք հավատում ենք, որ Հայաստանի հետ այս համաձայնագրի վավերացումից հետո անհնարինը հնարավոր կդառնա, եւ Հայաստանը կզգա այս փաստաթղթի դրական կողմերը»,- եզրափակել է դեսպանը:
Հիշեցնենք, որ այսօր ԱԺ Խորհրդարանական հանձնաժողովը դրական եզրակացություն է տվել Հայաստան-ԵՄ համաձայնագրի վավերացմանը:
