Մենք բազմիցս ասել ենք, որ նման պայմաններում ճիշտ կլինի, որ վարչապետի պաշտոնում առաջադրվի ՀՀԿ առաջնորդ Սերժ Սարգսյանը: Այս մասին այսօր Ազգային ժողովում լրագրողների հետ զրույցում ասաց ԱԺ փոխնախագահ Էդուարդ Շարմազանովը:
«Վաղը կլինի կուսակցության գործադիր մարմնի նիստ, մենք կքննարկենք Սերժ Սարգսյանի թեկնածությունը ներկայացնելու վերաբերյալ առաջարկը: Էթիկայի եւ կոռեկտության կանոններից ելնելով՝ չեմ ուզում գնահատականներ հնչեցնել, բայց կարծում եմ, որ որեւէ մեկի համար դժվար չէ կանխորոշել, թե ինչ պետք է լինի»,- ասաց նա:
Հարցին՝ Կարեն Կարապետյանին ՀՀԿ-ն քաղաքացիների ձայները ստանալու համա՞ր օգտագործեց, Շարմազանովը պատասխանեց. «Մի մտեք մատի ու մատանու արանքը, չդիտարկել ՀՀԿ-ին եւ Կարեն Կարապետյանին տարբեր տիրույթներում: Կարեն Կարապետյանը մեր կուսակցության առանցքային գործիչներից է, եղել է ու կլինի: Մենք թիմային խաղացողներ ենք, մեր նպատակն անձնավորված չէ, մեր նպատակն է ծառայել Հայաստանի Հանրապետությանը»:
ԱԺ փոխնախագահի խոսքով՝ խորհրդարանական հանրապետություններում էականը քաղաքական թիմերն են, ընտրվում է քաղաքական թիմ, որը ստանում է իշխանություն ձեւավորելու մանդատ: «Կարեն Կարապետյանը մեր կուսակցության նախագահի առաջին տեղակալն է եւ, ինչպես ասել եմ, նա ե՛ւ կառավարման համակարգում, ե՛ւ ՀՀԿ-ում ունի իր լուրջ անելիքը»,- նշեց նա՝ հավելելով, որ իրենք գոհ են Կարեն Կարապետյանի աշխատանքից:
Շարմազանովը համաձայն է այն տեսակետներին, որ վարչապետ Կարեն Կարապետյանը դարձավ փոփոխությունների խորհրդանիշ:
Ճշտող հարցին՝ եթե ՀՀԿ-ն գոհ է Կարեն Կարապետյանի աշխատանքից, ինչո՞ւ նրան չի տալիս շարունակելու հնարավորություն, հատկապես, որ ԱՎԾ տվյալներով՝ նրա կառավարման ժամանակ տնտեսական աճ ու ակտիվություն է գրանցվել, Էդուարդ Շարմազանովը պատասխանեց. «Նրա կառավարությունը ՀՀԿ եւ ՀՅԴ կառավարությունն է: Դրա մասին ես ասել եմ Կարեն Կարապետյանի ներկայությամբ: Նա անկուսակցական չէ, իշխող ՀՀԿ-ի երկրորդ դեմքն է: Այս կառավարության քաղաքական պատասխանատուն բացառապես ՀՀԿ ու ՀՅԴ կոալիցիան է: Այո՛, կառավարությունը դրական, լավ աշխատել է, արդյունքները տեսանելի են, դրանք արվել են քաղաքական մեծամասնության պառլամենտական լուրջ աջակցությամբ: Այդ ամենը չէր լինի առանց նախագահ Սերժ Սարգսյանի աջակցությամբ: Այդ ամենի բուրգի գլխին միշտ եղել է Սերժ Սարգսյանը»:
Խորհրդարանի փոխխոսնակն ասաց, որ մինչեւ ապրիլի 9-ը վարչապետն ուներ այլ ֆունկցիաներ, ապրիլի 9-ից հետո՝ այլ, եւ պետության վարչապետը մինչեւ ապրիլի 9-ը պետության լիդերը չէր:
«Այդ իմաստով մենք չենք սահմանափակել, չենք փոքրացրել Կարեն Կարապետյանի լիազորությունները, նա պարզապես չի ունեցել այն լիազորությունները, որոնք կունենա վարչապետը ապրիլի 17-ից: Նա չի ունեցել արտաքին գործերը, ուժային կառույցները, անվտանգության խորհուրդը ղեկավարելու իրավունք: Բոլոր այն հեքիաթները, թե մենք Կարեն Կարապետյանի լիազորությունները սահմանափում ենք, ուտոպիայի ժանրից են: Կառավարման համակարգի առաջամարտիկը, ղեկավարը լինելու է իշխող ուժի ղեկավարը»,- մանրամասնեց նա:
Հարցին, թե ո՞ր պաշտոնում է Կարեն Կարապետյանը շարունակելու պատասխանատվություն կրել, Շարմազանովը պատասխանեց. «Բոլորս հասկանում ենք, թե որ պաշտոնում է լինելու»: Ճշտող հարցին՝ փոխվարչապետի պաշտոնի մասի՞ն է խոսքը, նա պատասխանեց. «Շատ հավանական է»: