Ford ընկերությունը ներկայացրեց չորրորդ սերնդի Focus մոդելը: Ավտոմեքենայի շնորհանդեսը, որը ստացել է նոր հարթակ, դարձել է ավելի մեծ, բայց միեւնույն ժամանակ ավելի թեթեւ, քան նախորդը, տեղի է ունեցել Գերմանիայում հատուկ միջոցառման ժամանակ, հայտնում է Autonews.ru-ն:
Ավտոարտադրողը Focus-ն անվանում է «տեխնիկապես ամենակատարյալ մոդելը», որը Ford-ը մշակել է վերջին 2 տարիների ընթացքում:
Մեքենայի համար հիմք է հանդիսացել C2 բոլորովին նոր մոդուլային հարթակը, որը մշակվել է ընկերության եվրոպական ինժեներների կողմից: Բարձրորակ պողպատի եւ լրացուցիչ ալյումինե տարրերի շնորհիվ մեքենան երրորդ սերնդի «Ֆոկուսից» 88 կիլոգրամով թեթեւ է ստացվել:
Նոր «Ֆոկուսի» երկարությունը 4378 մմ է, ինչը 18 մմ-ով ավելի երկար է նախորդից: Անիվների հենքի չափը ավելացել է 53 մմ-ից մինչեւ 2701 մմ, ինչը թույլ է տալիս հետեւի ուղեւորների ոտքերի համար լրացուցիչ տարածություն թողնել:
Մեքենան ունի SYNC 3 կոմպլեքս Apple CarPlay եւ Android Auto ինտերֆեյսերով, ինչպես նաեւ Wi-Fi-ի հասանելիություն, որին կարող է միանալ 10 բջջային սարք: Դրանք կարող են մինչեւ 15 մետր հեռավորության վրա աշխատել:
Շարժիչներից մեկը երեք մխոցանի 1 լիտր ծավալով բենզինային EcoBoost-ն է, որը հասանելի է 85, 100 եւ 125 ձիաուժերով: Բացի այդ հասանելի են նաեւ երկու 1.5 լիտրանոց չորս մխոցանի շարժիչները, որոնք 150 եւ 185 ձիաուժ են զարգացնում:
Նոր Ford Focus-ը հեչբեքի, ունիվերսալի եւ սեդանի տեսքով կառաջարկվի: