«Դեղերի մասին» ՀՀ օրենքում առաջարկվող փոփոխությունների արդյունքում դեղերի գները կնվազեն: Այս մասին, այսօր՝ ապրիլի 11-ին, ԱԺ-ում «Դեղերի մասին» ՀՀ օրենքում լրացումներ կատարելու մասին օրենքի նախագիծը ներկայացնելիս նշեց օրինագծի համահեղինակներից ԱԺ տնտեսական հարցերի հանձնաժողովի նախագահ Հակոբ Հակոբյանը:
Նրա խոսքով, օրենքի 21-րդ հոդվածը թույլ է տալիս Հայաստան դեղեր ներկրել միայն մեծածախ լիցենզիա ունեցողներին. «Արդյոք բժշկական կազմակերպությունները, որոնք զբաղված են առողջապահության պահպանմամբ, բժշկական ծառայություններ մատուցելով, իրավունք ունե՞ն դեղ ներկրել, թե ոչ: Փաստորեն գործող օրենքով չունեն: Նրանք պետք է դեղը մեծածախ շուկայից գնեն, որ կարողանան իրենց բնականոն գործունեությունն ապահովել: Մենք առաջարկում ենք, որ հիվանդանոցները, որոնք ունեն դեղագործական դեղատուն, այսինքն ունեն դեղը պահելու վայր, ապա նրանց տանք հնարավորություն, որ դեղ ներմուծեն առանց մեծածախ լիցենզիա ունեցող գնորդին դիմելու»:
Հակոբ Հակոբյանը նկատեց, որ սա բերելու է դեղերի գների նվազման, որովհետեւ յուրաքանչյուր միջնորդ յուրաքանչյուր առքուվաճառքից ունենում է իր շահույթը, առաջանում է ավելացված արժեքի հարկ: «Բնականաբար, այս փոքր քայլով մենք ուղղակի հիվանդանոցներին տալիս ենք հնարավորություն այդ ծախսերը ավելորդ անգամ չկատարելու»:
Երկրորդ առաջարկը վերաբերում է ֆիզիկական անձանց կողմից արտասահմանից դեղ բերելուն: «Նույն 21-րդ հոդվածի 7-րդ կետում նախատեսված է, որ Հայաստանում ֆիզիկական անձը Հայաստան մտնելիս եւ դուրս գալիս կարող է առանց հավաստագրի իր հետ ունենալ դեղ՝ սեփական կարիքների համար: Մենք առաջարկել ենք, որ քաղաքացին կարող է ոչ միայն իր համար, այլեւ մոտավորապես երեք մարդու համար դեղ բերել: Որպեսզի կարողանան իրենց հարազատի, բարեկամի համար դեղ բերել: Առավել եւս, որ Հայաստանում դեղերը հարեւան երկրներից թանկ են, սրանով մենք ասում ենք, որ դու կարող ես քո երեխայի, քո ծնողի, քո հարազատի համար դեղ բերել»,-ընդգծեց Հակոբ Հակոբյանը:
Նշենք, որ կառավարությունը դեմ է արտահայտվել այս օրինագծի ընդունմանը:
