Ոսկեբեր հանքավայրի շահագործումը նախաձեռնողները պետական բյուջե հարկ չեն վճարում, չնայած վնասը, որ կարող է հասցվել շրջակա միջավայրին եւ մարդկանց, վիթխարի է: Այս մասին ապրիլի 11-ին լրագրողների հետ հանդիպման ժամանակ ասաց բնապահպան, Հայաստանի Կանաչների միության նախագահ Հակոբ Սանասարյանը:
Նրա խոսքով՝ «Ամուլսար» նախագիծը մի բան է, իսկ դրանից բխող եզրակացությունները՝ միանգամայն այլ: Այս հանքավայրի շահագործման ժամանակ կարող են ծանր մետաղներով վարակվել հողամասերը, դրանց վրա աճող բանջարեղենն ու մրգերը: «Ամուլսարը ոսկեբեր հանքավայր է, եւ մարդիկ հիմնական վտանգը կապում են ցիանիդի հետ, որը գոլորշիացող նյութ է»,- պարզաբանեց բնապահպանը:
Lydian Armenia ընկերության հայտարարությունները, որ իրենք զբաղված են պատասխանատու լեռնահանքային արդյունաբերությամբ եւ Ամուլսարի ոսկու հանքավայրի շահագործումը շրջանի բնակիչների առողջության վրա ոչ մի ազդեցություն չի ունենա, Սանասարյանն առասպել է համարում: Նա շեշտեց, որ հանքավայրը հարուստ է I եւ II կարգի թունավոր նյութերով, որոնք լեռան ավերմանը զուգահեռ շատ արագ ակտիվանում են: Նրանք միանգամայն ակտիվորեն ներգրավվում են երկրաքիմիական բաղադրության մեջ եւ իրենց թունավորության շնորհիվ գերակշռող դառնում: Բնահող-ջուր-բուսականություն համակարգում դրանց ագրեսիվության ազդեցությամբ հանքապարի հիմնական տարրերը երկրորդ պլան են մղվում: Դրանից բացի, բնությունը ծանր մետաղներից ինքնամաքրվելու մեխանիզմ չունի: Մարդու վրա դրանց ազդեցությունն անմիջապես չի զգացվում, քանի որ չունեն ո՛չ հոտ, ո՛չ համ: Թունավոր սննդամթերքի ազդեցությունը երեւան է գալիս տասնյակ տարիներ հետո եւ ծայրահեղ բացասական ձեւով՝ ուռուցքային հիվանդություններ, վերարտադրողական եւ ժառանգական ֆունկցիաների ախտահարում:
