Ընտրական գործընթացների նկատմամբ վստահության բարձրացման առումով անելիք ունեն ոչ միայն ընտրական հանձնաժողովները, այլ նաեւ քաղաքական ուժերը, քաղաքացիական հասարակությունը: Այս մասին, այսօր՝ ապրիլի 11-ին, ԱԺ-ում «Կենտրոնական ընտրական հանձնաժողովի գործունեության մասին» հաղորդումը քննարկելու ժամանակ նշեց ԿԸՀ նախագահ Տիգրան Մուկուչյանը:
Նրա խոսքով, ցանկացած պարագայում չպետք է անտեսվի կատարված աշխատանքը. «Գոնե այս ընտրությունների ժամանակ կիրառված տեխնիկական միջոցները, ընտրողների ցուցակների հրապարակումը, հստակ դարձրեց, որ տեղամասում որեւէ կրկնաքվեարկության դեպք չի եղել:
Այս պայմաններում ունենում ենք դեպքեր, որ առանձին կուսակցությունների ներկայացուցիչներ, որ վերջին անգամ երեւի ընտրությունների մասնակցել են 1990-ական թվականներին, դատողություններ են ներկայացնում հանրության առջեւ՝ խոսելով ընտրակեղծիքների մասին: Սա չի կարող նպաստել հանրային վստահության բարձրացմանը»,-ասաց Մուկուչյանը:
Ըստ նրա, այո, պետք է լինի քննադատություն, վեր հանվեն բոլոր թերացումները, բայց պետք է փաստել նաեւ առաջընթացը. «Այսօր ընտրողը հաստատ գիտի՝ ինչպես ինքը քվեարկում է, իր քվեն լիարժեք արտացոլվում է արձանագրության մեջ: Պնդումները, թե ընտրողները գնում, քվեարկում են, հետո արդյունքները չի համապատասխանում, գոնե այսօր մեխանիզմներն այնպիսին են, որ դրանում յուրաքանչյուրն է վստահ:
Այդ ինչպես է պատահում, որ ընտրական գործընթացին մասնակցում է 50-60 հազարից ավելի քաղաքացի, որոնք ուղղակի քաղաքական շահեր հետապնդող անձինք են, վստահված անձինք, բազմակուսակցական հանձնաժողովի անդամներ եւ քվեարկության հետ կապված դիմում են ներկայացնում բացառապես 1-2 ՀԿ-ների դիտորդների կողմից: Այսինքն նրանք ավելի շահագրգիռ են քաղաքական գործընթացի առկա խախտումներն արձանագրելու առումով, քան թե գործընթացին մասնակցող կուսակցություննե՞րը: Իհարկե ոչ:
Պետք է խնդիրը դրվի եւ բողոքարկման մշակույթի ձեւավորման տեսանկյունից, եւ բողոքների քննության տեսանկյունից»,-իր խոսքն ամփոփեց ԿԸՀ նախագահը: