19-ամյա ադրբեջանցի Ռինաթը փախցրել է իր սիրեցյալ՝ 17-ամյա Ռոզային եւ ողջ գիշեր նրան պահել է Մերձմոսկվայի Շչելկովսկի շրջանի Մոնինո ավանում: Ինչպես հայտնի է դարձել «Մոսկովսկի կոմսոմոլեց» թերթին, մի քանի ամիս առաջ երիտասարդը ծնողների համար անսպասելի (նրա մայրը ռուս է, հայրը՝ ուղղափառություն դավանող ադրբեջանցի) իսլամ է ընդունել եւ սկսել հաճախել մահմեդականների հոգեւոր ուսումնարան՝ մեդրեսե:
Մոտավորապես հենց այդ ժամանակ նա սիրահարվել է Մոսկվայի բժշկական ուսումնարաններից մեկի ուսանողուհիներից մեկին, ով նույնպես ադրբեջանցի է: Սակայն, երիտասարդը, մահմեդական ավանդույթների համաձայն, չի խոստովանել աղջկան իր զգացմունքների մասին, փոխարենն օրերս համապատասխան կարգով այցելել է նրա հորը եւ խնդրել աղջկա ձեռքը:
Պարզվել է, որ Ռոզան արդեն նշանվել է մեկ ուրիշի հետ, որից հետո «Ռոմեոն» որոշել է իր 3 ընկերների հետ փախցնել աղջկան:
Նա բժշկական ուսումնարանի մոտ սպասել է Ռոզային, հետո ընկերների հետ բռնությամբ նստեցրել «Ժիգուլի» մեքենան եւ տարել Մոնինո ավան:
Հատկանշական է, որ նա ուսանողուհուն գողացել է նրա 18-ամյակի նախօրեին (չափահաս դառնալուց մի օր առաջ): Ռոզայի կուրսեցիների օգնությամբ, ովքեր տեսել էին, թե ինչպես է Ռինաթը բռնությամբ մեքենան նստեցնում աղջկան, ոստիկանները կարողացել են գտնել նրան: Արդեն հաջորդ օրը՝ հունվարի 12-ին ոստիկաններն ազատել են Ռոզային եւ ձերբակալել երիտասարդներին:
