ԱՄՆ-ն չի բացառում Սիրիայում ռուսական թիրախներին հարվածելու հնարավորությունը, եթե դա պահանջվի: Այս մասին ճեպազրույցի ժամանակ հայտարարել է Սպիտակ տան ներկայացուցիչ Սառա Սանդերսը, հայտնում է ՌԲԿ-ն:
«Մենք դիտարկում ենք բոլոր տարբերակները»,- ասել է Սանդերսը՝ ընդգծելով, որ Վաշինգթոնում Դամասկոսի հետ հավասար Ռուսաստանին են պատասխանատու համարում Սիրիայում քիմիական հարձակման համար:
Սանդերսը նշել է, որ Ռուսաստանը վերջին շրջանում իրեն երաշխավորել է որպես «բացասական կերպար»: Միեւնույն ժամանակ լրագրողների հարցին՝ արդյոք Վաշինգթոնը Ռուսաստանին համարո՞ւմ է իր թշնամին, Սպիտակ տան ներկայացուցիչը հրաժարվել է միանշանակ պատասխան տալ: Սանդերսը պարզաբանել է, որ «Ռուսաստանը պետք է մեզ օգնի այդ հարցը պարզել», եւ այս հարցի վերջնական պատասխանը կտա ապագայում Մոսկվայի պահվածքը:
Ռուսաստանի եւ ԱՄՆ հարաբերություններում սրումը կապված է սիրիական Դումայում ենթադրյալ քիմիական հարձակման մասին տեղեկությունների հետ, ինչի համար արեւմտյան երկրները Դամասկոսին են մեղադրել: Վաշինգթոնը նախազգուշացրել է Սիրիային ռազմական հարված հասցնելու պատրաստակամության մասին: Ապրիլի 9-ին Դոնալդ Թրամփը հայտարարել էր, որ 48 ժամում որոշում կընդունի սիրիական ռեժիմին պատասխան գործողությունների մասին՝ նախազգուշացնելով, որ պատասխանը կարող է որոշակիորեն խիստ լինել: Թրամփը շեշտել էր՝ եթե պարզվի, որ քիմիական հարձակման պատասխանատվության մաս է կրում նաեւ Պուտինը, ապա «Ռուսաստանի նախագահը դրա համար կվճարի»: Ապրիլի 11-ին Թրամփի նախանաշած ժամկետը լրացել է:
Միաժամանակ, Լիբանանում Ռուսաստանի դեսպան Ալեքսանդր Զասիպկինը հայտարարել էր, որ Մոսկվան իրավունք ունի խփելու հրթիռները, որոնք Սիրիայի վրա կարձակվեն ամերիկյան զորքերի կողմից: Ռուսաստանցի դիվանագետի այս հայտարարությունը մեկնաբանել է անձամբ ԱՄՆ նախագահը: «Ռուսաստանը խոստանում է խփել Սիրիայի վրա արձակված ցանկացած հրթիռ: Ռուսաստան, պատրաստվի՛ր, որովհետեւ դրանք կթռչեն»,- նշել է նա իր Twitter-ում:
Միեւնույն ժամանակ, ճեպազրույցի ժամանակ Սպիտակ տան ներկայացուցիչ Սառա Սանդերսը հայտնել էր, որ Սիրիային հարվածելու վերջնական որոշումը Դոնալդ Թրամփը դեռեւս չի ընդունել: ԱՄՆ վարչակազմում լրատվամիջոցների աղբյուրները հստակեցրել էին, որ Վաշինգթոնն առայժմ իր դաշնակիցների հետ խորհրդակցություններ է անցկացնում: Եթե ուժի կիրառումը հավանություն ստանա, Դամասկոսի ուժերի վրա հարձակման որոշումը կընդունվի շաբաթվա վերջին:
Սպիտակ տուն. Թրամփը Սիրիայի հարցով դեռ վերջնական որոշումը չի կայացրել