ԱՄՆ Կոնգրեսի Հայկական հարցերով կոմիտեի ղեկավարները իրենց գործընկերներին կոչ են արել միանալ իրենց նախաձեռնությանը, որը նախագահ Դոնալդ Թրամփին կոչ է անում ապրիլի 24-ին պատշաճ կերպով հարգել Հայոց ցեղասպանության զոհերի հիշատակը: Այս մասին տեղեկացնում է Ամերիկայի Հայ Դատի հանձնախումբը:
Իրենց նամակում կոմիտեի առաջնորդներ Ֆրենկ Փալոնեն, Ջեքի Սփիերը, Դեյվիդ Թրոտը եւ Դեյվիդ Վալադաոն, ինչպես նաեւ Գուս Բիլիրաքիսը եւ Ադամ Շիֆը նշել են, որ Հայոց ցեղասպանությունը կարեւոր հիշեցում է այն մասին, որ մարդկության դեմ հանցագործությունները չպետք է չճանաչված եւ չդատապարտված մնան: Նրանց խոսքով՝ հարգանքի տուրք մատուցելով Հայոց ցեղասպանության զոհերի հիշատակին, «մենք վերահաստատում ենք ապագա վայրագությունները կանխելու մեր հանձնառությունը»:
«Հայոց ցեղասպանության ճանաչման միջոցով մենք պատշաճ հատուցում ենք տալիս վերապրածների հաստատակամությանն ու վճռականությանը, ինչպես նաեւ հայկական արմատներով ամերիկացիներին, ովքեր կշարունակեն ամրապնդել մեր երկիրը», - ասվում է նամակում:
