Եվրոպայում անվտանգության եւ համագործակցության կազմակերպության (ԵԱՀԿ) Ժողովրդավարական հաստատությունների եւ մարդու իրավունքների գրասենյակի (ԺՀՄԻԳ) ներկայացուցիչների մամուլի ասուլիսը Բաքվում, որոնք դիտորդական առաքելություն էին իրականացնում Ադրբեջանում կայացած նախագահական ընտրություններին, սկանդալի է վերածվել: Ինչպես հաղորդում է contact.az-ը, ԵԱՀԿ/ԺՀՄԻԳ առաքելությունը ապրիլի 12-ին ստիպված է եղել ընդհատել մամուլի ասուլիսը, երբ իշխանամետ լրագրողներն ու կառավարության ներկայացուցիչները սկանդալ են հրահրել:
Նշված անձինք սկսել են բղավել ու բողոքել, երբ առաքելությունը սկսել է թվարկել ընտրությունների ընթացքում եւ քվեարկության գործընթացում գրանցված խախտումները: Իշխանության ներկայացուցիչների հատուկ արձագանքին արժանացավ պնդումն այն մասին, որ քվեաթերթիկ զանգվածային լցոնումներ, տարբեր ընտրատարածքներում միեւնույն մարդկանց կողմից բազմակի քվեարկության դեպքեր են եղել:
«Դադարե՛ք ստել», «Ճիշտ չէ՛», սկսել են բղավել մարդիկ եւ անցել ամբիոնից այն կողմ, որտեղ նստած էին դիտորդները: Արդյունքում, միջոցառումը դադարեցվել էր, իսկ առաքելության անդամները՝ լքել դահլիճը: «Թող գնան այստեղից, ովքե՞ր են նրանք, որպեսզի սուտ ասեն»,- բղավում էր մարդկանց մի խումբը: 20 րոպե անց, երբ նրանց խոստացան, որ կարգի խախտում չի լինի, առաքելության անդամները վերադարձան եւ շարունակեցին կարդալ իրենց եզրակացությունը: