Ադրբեջանի պետական նավթային ընկերությունը շարունակում է ջանքեր գործադրել Ռուսաստան-Հայաստան գազատարի վրացական հատվածի մասնավորեցմանը մասնակցելու եւ հաղթելու համար: Այս մասին այսօր՝ հունվարի 14-ին հայտարարել է Ընկերության նախագահ Ռովնագ Աբդուլաեւը:
«Ադրբեջանական կողմը մտադիր է օգտագործել այդ գազատարը՝ իր գազը դեպի Սեւ ծովի ափ արտահանելու համար»,- հայտարարել է նա:
Ինչպես հաղորդում է ադրբեջանական APA գործակալությունը, վրացական կողմն այդ գազատարն արդեն դուրս է բերել Վրաստանի ռազմավարական օբյեկտների ցանկից, որոնք մասնավորեցման ենթակա չեն:
Նշենք, որ նախորդ տարվա ընթացքում այդ տեղեկատվությունը բազմաթիվ անգամ հրապարակվել է, սակայն վրացական կողմը մե՜կ հերքում է դա, մե՜կ անուղղակի՝ հաստատում:
