Ընդդեմ Սերժ Սարգսյանի վարչապետության ավտոերթի մասնակիցները կարողացել են անցել Բաղրամյան պողոտայով եւ իրազեկման ակցիա են արել Երեւանի փողոցներում։
Ավտոերթը մեկնարկել էր Բրազիլիայի հրապարակից եւ միացել Մաշտոցի պողոտայում հավաքված ցուցարարներին։ Որից հետո որոշվել էր ավտոերթ անել դեպի Բաղրամյան պողոտա՝ իրազեկելով վաղը՝ ապրիլի 13-ին Ազատության հրապարակում կայանալիք հանրահավաքի մասին։
Ցուցարարները նա որոշել են միանալ դեպի Երեւան շարժվող, «Քաղաքացիական պայմանագիր» կուսակցության նախագահ Նիկոլ Փաշինյանին, սակայն ուշ ժամի պատճառով իրազեկում են արել միայն Երեւանում։ Ակտիվիստ Դավիթ Սանասարյանը նաեւ ճանապարհին մի արագաչափ է փակել կպչուն ժապավենով։
Նշենք, որ այսօր «Հանուն Հայաստան պետության» ճակատը, «Մերժիր Սերժին» նախաձեռնության անդամները անսպասելիորեն փակել էին Մաշտոցի պողոտան՝ Ֆրանսիայի հրապարակի հատվածում։
Ցուցարարները նաեւ վրան էին դրել փողոցի մեջտեղում։ Ոստիկանները հանել եւ տարել էին վրանը, սակայն մոտ մեկ տասնյակ երիտասարդներ նստել էին գետնին, անգամ պառկել եւ փակել են պողոտայի երթեւեկությունը։ Անցնող մեքենաների մի մասը ազդանշաններով ողջունում էր ցուցարարներին, մյուս մասն էլ դժգոհում, որ փակել են փողոցը։ Ոստիկաններն ուժով բացել էին փողոցը։
Ցուցարարների մեկ այլ խումբ էլ ավտոերթ էր սկսել Բրազիլիայի հրապարակից եւ շարժվելու են դեպի Ազատության հրապարակ։
Նշենք, որ ակցիայի մասնակիցները բողոքում են Սերժ Սարգսյանի վարչապետության դեմ։
