Թուրքիայի ղեկավարությունը մտադիր է ՆԱՏՕ գլխավոր քարտուղար Յենս Սթոլթենբերգի հետ քննարկել Սիրիայում ԱՄՆ-ի եւ դաշնակիցների կողմից ռազմական գործողություններ սկսելու պարագայում «Ինջիրլիք» ռազմաբազայի օգտագործման հնարավորությունները։ Այս մասին հինգշաբթի հայտարարել է Թուրքիայի արտաքին գործերի նախարարության պաշտոնական ներկայացուցիչ Համի Ակսոյը, գրում է ՏԱՍՍ-ը։
ՆԱՏՕ գլխավոր քարտուղար Յենս Սթոլթենբերգը ապրիլի 16-ին պաշտոնական այցով կժամանի Անկարա, որտեղ նախատեսվում է հանդիպել Թուրքիայի նախագահ Թայիփ Էրդողանի, Թուրքիայի զինված ուժերի գլխավոր շտաբի պետ Հուլուսի Աքարի, արտաքին գործերի նախարար Մեվլութ Չավուշօղլուի եւ պաշտպանության նախարար Նուրետին Ջանիկլիի հետ:
Սպասվում է, որ բանակցությունների գլխավոր թեմաներն են լինելու Թուրքիայի եւ ՆԱՏՕ-ի հարաբերությունները, ահաբեկչության դեմ պայքարը, «Ձիթապտղի ճյուղ» գործողությունը, ինչպես նաեւ ՆԱՏՕ գագաթնաժողովի նախապատրաստումը, որը նախատեսված է անցկացնել 2018 թվականի հուլիսի 11-ին Բրյուսելում: