ԵՊՀ կենտրոնական մասնաշենքի դիմաց հավաքվել են մի խում ուսանողները, որոնք դասադուլ են սկսել։

Դասադուլին մասնակցող ուսանողներից մեկը NEWS.am-ի հետ զրույցում ասաց, որ իրենք միացել են «Իմ քայլը» նախաձեռնությանը եւ նպատակ ունեն ուսանողներին տեղեկացնել, որ այսօր` ապրիլի 13 ին, ժամը 18.30-ին Ազատության հրապարակում բողոքի հանրահավաք է տեղի ունենալու ընդդեմ Սերժ Սարգսյանի վերարտադրության: 

Ուսանողները բարձրախոսով վանկարկում էին «դասադուլ», «Քայլ արա, մերժիր Սերժին» եւ կոչ էին անում բոլոր ուսանողներին միանալ իրենց: Նրանք նշեցին, որ ժամը 13.00-ին գնալու են «Հյուսիսային» ավտոկայան դիմավորելու քայլարշավով Երեւան հասնող Նիկոլ Փաշինյանին ու նրա աջակիցներին:

Ավելի վաղ NEWS.am-ը հայտնել էր, որ օրեր առաջ մի խումբ ուսանողներ Երեւանի պետհամալսարանում իրազեկման ակցիա են իրականացրել ապրիլի 13-ին Ազատության հրապարակում սպասվող հանրահավաքի մասին եւ բաժանել են #ԻմՔայլը շարժման թռուցիկները, որի ժամանակ միջադեպ է տեղի ունեցել: Մասնավորապես, ԵՊՀ անվտանգության պետը հարձակվել է ուսանողների վրա, քաշքշել նրանց եւ խլել թռուցիկները: Ուսանողները միջադեպի մասին ահազանգել են Մարդու իրավունքների պաշտպանի գրասենյակ:

Նշենք, որ «Քաղաքացիական պայմանագիր» կուսակցությունը՝ Նիկոլ Փաշինյանի գլխավորությամբ, մարտի 31-ից քայլարշավ է սկսել Հայաստանի քաղաքներով, որը կավարտվի ապրիլի 13-ին Ազատության հրապարակում շուրջօրյա հանրահավաքներով: Նանք հայտարարել են, որ մտադիր են ապրիլի 17-ին շրջափակել ԱԺ շենքը, նաեւ պատգամավորների տները եւ թույլ չտալ, որ նրանք մասնակցել ԱԺ-ում վարչապետի ընտրությանը: