Իրանն ակնկալում է, որ Ֆրանսիան տուրք չի տա Սաուդյան Արաբիայի թագաժառանգ արքայազն Մուհամմեդ բեն Սալմանի հայտարարություններին: Այս մասին հայտարարել է Իրանի ԱԳՆ պաշտոնական ներկայացուցիչ Բահրամ Քասեմին,փոխանցում է Tasnim-ը:
«Սաուդյան Արաբիայի կողմից Իրանի միջուկային համաձայնության դեմ ուղղված կրկնվող եւ ամբողջովին կեղծ մեղադրանքները չպետք է ազդեցություն գործեն Ֆրանսիայի՝ որպես «վեցնյակի» անդամի վրա», - ասել է Քասեմին՝ մեկնաբանելով Մուհամեդդի՝ Փարիզ կատարած այցի ժամանակ արված հայտարարությունը: Նրա խոսքով՝ արքայազնի հայտարարությունները պայմանավորված են ահաբեկչության դեմ պատերազմում Իրանի հաղթանակի հետ կապված զայրույթով:
Խոսելով Իրանի հրթիռային ծրագրի մասին՝ Քասեմին նշել է, որ Փարիզը գիտի, որ այս ծրագիրը նպատակ ունի զսպել եւ պաշտպանել, չի հակասում անվտանգությանը եւ չի սպառնում այլ երկրների շահերին: «Դա, իհարկե, ներքին խնդիր է, եւ որեւէ երկիր չի կարող միջամտել այդ գործընթացին», - ընդգծել է նա: