Նախագահ Դոնալդ Թրամփը դեռեւս որոշում չի կայացրել այն մասին, թե արդյոք Միացյալ Նահանգները պետք է Սիրիայի դեմ ռազմական ուժ կիրառի: Այս մասին հայտնել է ՄԱԿ-ում ԱՄՆ մշտական ներկայացուցիչ Նիկի Հեյլին` ելույթ ունենալով Սիրիայի շուրջ ստեղծված իրավիճակի վերաբերյալ Անվտանգության խորհրդի նիստում, հաղորդում է ՏԱՍՍ-ը:
«Մեր նախագահը դեռ որոշում չի կայացրել Սիրիայում հնարավոր գործողությունների մասին», - ասել է Հեյլին: Սակայն, եթե ԱՄՆ-ն եւ նրա դաշնակիցները որոշեն գործել Սիրիայում, ապա դա կլինի այն սկզբունքի օգտին, որի հետ մենք բոլորս համաձայն ենք», - ասել է ամերիկացի դիվանագետը:
Հեյլին իր ռուս գործընկեր Վասիլի Նեբենզային ասել է, որ չի հասկանում, թե ինչպես նա կարող է անվրդով դեմքով ելույթ ունենալ ՄԱԿ-ի Անվտանգության խորհրդում: Նրա կարծիքով, Անվտանգության խորհուրդը պետք է հանդիպում անցկացներ ոչ թե Միացյալ Նահանգների կողմից Սիրիայի դեմ միակողմանի սպառնալիքների թեմայով, այլ քննարկեր ներկա իրավիճակում Ռուսաստանի գործողությունները եւ որոշումները:
«Մենք պետք է քննարկենք այն գործողությունները, որոնք հանգեցրել են այս իրավիճակին: Մենք չպետք է դատապարտենք երկրին կամ երկրների խմբին, որոնք համարձակվել են պաշտպանել մեր ընդհանուր սկզբունքը՝ քիմիական զենքի չկիրառման սկզբունքը: Պետք է դատապարտենք այն երկրին, որը միակողմանի կերպով կանխել է ԱԽ-ի աջակցությունն այս սկզբունքին: Միայն Ռուսաստանն է, որ ոչնչի առջեւ կանգ չառավ, որպեսզի պաշտպանի սիրիական ռեժիմի կողմից քիմիական զենքի կիրառման բազմաթիվ դեպքերը», - ասել է նա:
Այս կապակցությամբ նա նշել է, որ Մոսկվան է միայն պատասխանատու Սիրիայում քիմիական հարձակումների հետաքննության կապակցությամբ ՄԱԿ-ի եւ ՔԶԱԿ-ի համատեղ մեխանիզմի վերացման համար:
Միացյալ Նահանգները կարծում են, որ սիրիական իշխանությունները առնվազն 50 անգամ օգտագործել են քիմիական զենքը, սակայն այդ մասին հաղորդումները մի քանի անգամ ավելի շատ են, նշել է ԱՄՆ մշտական ներկայացուցիչը: