«Պետք է պատրաստ լինել ցանկացած իրավիճակի»։ Այդ մասին շրջափակված Ֆրանսիայի հրապարակում հայտարարել է ԱԺ պատգամավոր Նիկոլ Փաշինյանը։ Նա նշել է, թե տպավորություն է, որ ոստիկանությունը չի հարձակվելու, սակայն պետք է պատրաստ լինեն հնարավոր ցանկացած զարգացման։
Նա նշել է, թե վարժություններ են անելու, որ անհրաժեշտության դեպքում շտապ հավաքվեն։
«Իմ Քայլը» շարժման երթի մասնակիցները, որոնք արգելափակել են Ֆրանսիայի հրապարակը, ակտիվորեն պատրաստվում են գիշերելու, հընթացս էլ սցենարներ մշակում, որ ոստիկանների հարձակման դեպքում անակնկալի չգան։
Ֆրանսիայի հրապարակի տարածքում համազգեստով ոստիկան գրեթե չկա, չկա նաեւ շտապօգնության մեքենան, որը զանգվածային միջոցառւոմների ժամանակ սովորաբար լինում էր տարածքում եւ հերթապահում էր։
Նշենք, որ ոստիկանությունը հայտարարություն է տարածել՝ Ֆրանսիայի հրապարակում Նիկոլ Փաշինյանի եւ նրա կողմնակիցների նստացույցի կապակցությամբ։ «ՀՀ ոստիկանությունը հիշեցնում է, որ «Վարչական իրավախախտումների վերաբերյալ» ՀՀ օրենսգրքի 180-րդ հոդվածի համաձայն՝ հասարակական վայրերում գիշերային ժամանակ (23.00-ից մինչեւ 7.00-ն) լռությունը խախտելը համարվում է վարչական իրավախախտում:
ՀՀ ոստիկանությունը հավաքի մասնակիցներից ակնկալում է գիշերային ժամանակ ձեռնպահ մնալ աղմուկով ուղեկցվող գործողություններից, հարգել մեր համաքաղաքացիների հանգստի իրավունքը, եւ չխաթարել հավաքի վայրի հարակից շենքերի բնակիչների անդորրը»,- ասվում է հայտարարության մեջ: