ԱՄՆ նախագահ Դոնալդ Թրամփն իր հեռուստատեսային ուղերձում հայտարարել է, որ սկսել է Սիրիայում «կետային հարվածներ» հասցնել՝ ի պատասխան Սիրիայի Դումա քաղաքում անցած շաբաթ ենթադրական  քիմիական հարձակմանը, հայտնում է «Վեդոմոստին»։

 Թրամփի խոսքով՝ գործողությունն իրականացվում է Մեծ Բրիտանիայի ու Ֆրանսիայի զինված ուժերի հետ համատեղ։

«Ես հրամայեցի ԱՄՆ զինված ուժերին սկսել կետային հարվածներն այն օբյեկտներին, որոնք առնչություն ունեն Սիրիայի բռնապետ Բաշար Ասադի քիմիական զենքի հետ»,-ասել է Թրամփը: Նա շեշտել է, որ այդ արշավի նպատակն է «ստեղծել ուժեղ զսպող գործոն քիմիական զենքի արտադրության, տարածման ու գործածման դեմ»։

Նա դիմել է Ռուսաստանին ու Իրանին, որոնք աջակցում են Ասադի վարչակարգը․ «Իրանին ու Ռուսաստանին ես հարցնում եմ՝ « Ո՞ր ազգն է ուզում կապակցված լինել անմեղ տղամարդկանց, կանանց ու երեխաների զանգվածային սպանությունների հետ»,- ասել է Թրամփը (մեջբերումը՝ Reuters)։ Միաժամանակ Թրամփը նշել է, որ ԱՄՆ-ն կարող էր լավ հարաբերություններ ունենալ Ռուսաստանի ու Իրանի հետ, եթե այդ երկրները փոխեին իրենց դիրքորոշումը Սիրիայի մասով․ «Ռուսաստանը պետք է որոշի՝ արդյոք նա շարունակում է այս մութ ուղին»։

Թրամփը Ռուսաստանին կոչ է արել պատրաստվել Սիրիայի վրա հրթիռային հարվածի։

Նա խոստացել է, որ «այդ գազանություներին ամերիկյան, բրիտանական ու ֆրանսիական համատեղ պատասխանը» ներառելու է բոլոր գործիքները՝ «ռազմական, տնտեսական ու դիվանագիտական»։ Թրամփը հավելել է, որ հարվածները կշարունակվեն այնքան ժամանակ, քանի դեռ սիրիական վարչակարգը չդադարեցնի քիմիական զենքի գործածումը։

ԱՄՆ նախագահի խոսքով՝ ԱՄՆ-ն չի կարող գործել ամենուրեք, որտեղ բռնապետություն կա, սակայն Մերձավոր Արևելքը խնդրահարույց վայր է։ «Մենք կձգտենք այն ավելի լավը դարձնել, բայց դա խնդրահարույց վայր է,- նշել է նա, - ԱՄՆ-ն գործընկեր ու ընկեր կլինի։ Բայց տարածաշրջանի ճակատագիրը նրա սեփական ժողովրդի ձեռքերում է»։

Մեծ Բրիտանիայի վարչապետ Թերեզա Մեյը հաստատել է գործողությանը Մեծ Բրիտանիայի մասնակցությունը։  «Մենք կնախընտրեինք այլընտրանքային ուղի, բայց այս դեպքում այն չկա»։ Նրա խոսքով՝ հարվածները ոչ մի կապ չունեին «ռեժիմի փոփոխությանը» կամ «քաղաքացիական պատերազմին միջամտությանը», դրանք պետք է «զսպեին քիմիական զենքի գործածումը» սիրիական կառավարությունում։ Ֆրանսիայի նախագահ Էմանուել Մակրոնը նույնպես հաստատել է գործողությանը Ֆրանսիայի մասնակցությունը։

Պենտագոնում Սիրիայի վրա հարվածները անվանել են «միանվագ ակցիա» ։ Հարվածների են ենթարկվել սիրիական հետազոտական կենտրոնն ու քիմիական զենքի պաշարներով պահեստը, հայտնել են ԱՄՆ ԶՈՒ-ից։