«Քաղաքացիական պայմանագիր» կուսակցության առաջնորդ Նիկոլ Փաշինյանը Հանրային ռադիոյում ուղերձով ժողովրդին դիմելուց հետո իր աջակիցների հետ լքել է շենքը: Ցուցարարները շարունակում են իրենց երթը Երեւանի փողոցներում (ֆոտոռեպորտաժ):
Հասնելով Հայաստանի ֆուտբոլի ֆեդերացիայի շենքին՝ Փաշինյանը հայտարարեց. «2015-ի նոյեմբերի 30-ին հրապարակվել է ՀՖՖ նախագահ Ռուբեն Հայրապետյանի հայտարարությունը, որում նա նշել է. «Եթե 2018 թվականի աշխարհի առաջնության առաջիկա ընտրական փուլը Հայաստանի հավաքականը ձախողի, ես հրաժարական կտամ: Երբեք չեմ ասել, որ շրջափուլի չստացվելու դեպքում կհեռանամ, բայց հիմա ասում եմ»:
Այսինքն՝ ՀՖՖ նախագահը հայտարարել է, որ եթե հավաքականը ձախողի շրջափուլը, ինքը հրաժարական կտա: Հայաստանի հավաքականը դուրս է մնացել այդ շրջափուլից եւ Ռուբեն Հայրապետյանը, իր կուսակցական ղեկավար Սերժ Սարգսյանի նման, մինչ օրս հրաժարական չի տվել»,- հայտարարեց Փաշինյանը՝ հավելելով, որ ինչպես Սերժ Սարգսյանը ստեղծել է ստահոդ պետություն, այնպես էլ Ռուբեն Հայրապետյանը ստեղծել է ստահոդ ֆուտբոլ:
«Սա մարտահրավեր է Ռուբեն Հայրապետյանին, որ իր կուսակցական շեֆի նման խոսքի տեր չէ, խոսքից թռնող է: Եթե խոսքիդ տերն ես, Ռուբեն Հայրապետյան, հեռացիր քո խոստմանը համապատասխան»,- ասաց ՔՊ ղեկավարը:
Նա ձեռքում պահել էր ծակ ու ցեխոտ գնդակ՝ ասելով. «Այս ծակ ու ցեխոտ գնդակն այսօրվա հայկական ֆուտբոլի սիմվոլն է»: Այնուհետեւ Փաշինյանը ոտքով հարվածեց գնդակին՝ նետելով ՀՖՖ շենքի դռան մոտ, ապա ցուցարարները սուլելով հեռացան: