Ռուսաստանի նախագահ Վլադիմիր Պուտինը խնդրել է իր ֆրանսիացի գործընկեր Էմանուել Մակրոնին կիսվել Սիրիայի Դումա քաղաքում ենթադրյալ քիմիական հարձակման փաստերով, սակայն մերժվել է: Այս մասին հաղորդել է Ռուսաստանի արտգործնախարար Սերգեյ Լավրովը:
Լավրովը նշել է, որ բացի լրատվամիջոցների եւ սոցիալական ցանցերի հիշատակումից, ինչպես նաեւ մասնագետների համար բավականին ծիծաղելի տեսագրությունից, ուրիշ «ոչինչ չի ներկայացվում»: Նրա խոսքով՝ Մակրոնը հրաժարվել է բացահայտել Ֆրանսիայի մոտ գտնվող ենթադրյալ քիմիական հարձակման տվյալները:
«Պատասխանն էլ էր նույնը. մենք չենք կարող տրամադրել այդ տվյալները, քանի որ դա գաղտնիք է, մանավանդ, որ դա մեր գաղտնիքը չէ», — «ՌԵՆ ՏՎ»-ն մեջբերել է Լավրովի խոսքը:
Լավրովը Սիրիայում ԱՄՆ-ի եւ նրա դաշնակիցների գործողությունները անընդունելի եւ անօրինական է անվանել: «Միացյալ Նահանգների նախագահը եւ Մեծ Բրիտանիայի վարչապետը, եւ Ֆրանսիայի նախագահը հայտարարեցին, որ իրենք անհերքելի փաստեր ունեն, որ առաջին հերթին Դումայում քիմիական զենք է կիրառվել, եւ երկրորդ, որ դա արել է ոչ այլ ոք, քան Բաշար Ասադը՝ համապատասխան հրաման տալով», - ասել է Լավրովը, հաղորդում է ՏԱՍՍ-ը:
ԱՄՆ-ի հայտարարություններն այն մասին, որ Դամասկոսն արգելափակել է ՔԶԱԿ-ի փորձագետների մուտքը Արեւելյան Գուտա, Լավրովը նշել է, որ իրականությանը չեն համապատասխանում:
«Ընդ որում, իհարկե, բոլորին հասկանալի է, որ որ դա տեղի ունեցավ մեկ օր առաջ, երբ ՔԶԱԿ փորձագետները, որոնք արդեն ժամանել էին Բեյրութ, պետք է ուղեւորվեին դեպքի վայր, որպեսզի համոզվեին այնտեղ քիմիական զենքի կիրառման վկայությունների առկայության կամ բացակայության մեջ»:
Նրա խոսքով՝ փորձագետները հաստատել են, որ պատրաստ են գնալ Դումա, որպեսզի իրականացնեն իրենց առաքելությունը: Նա հույս է հայտնել, որ այս անգամ նրանց թույլ կտան դա անել: