ՀՀԿ Խորհուրդը վերջնական որոշում կայացրեց. վարչապետի թեկնածու են առաջադրելու Սերժ Սարգսյանին: Նրա թեկնածությունն առաջադրել է կուսակցության առաջին փոխնախագահ Կարեն Կարապետյանը, Խորհուրդն էլ քննարկել ու միաձայն կողմ է արտահայտվել: Արդեն երկուշաբթի՝ ապրիլի 16-ին, Ազգային ժողովի ՀՀԿ խմբակցությունը պաշտոնապես կառաջադրի վարչապետի իր թեկնածուին, իսկ ընտրությունը կկայանա ապրիլի 17-ին, Ազգային ժողովի հատուկ նիստում:
Ի դեպ՝ ՀՀԿ Գործադիր մարմնի եւ Խորհրդի նիստն այսօր արտագնա է եղել. հանրապետականները հավաքվել են Ծաղկաձորում: Երեկվանից հանրահավաք անցկացնող Նիկոլ Փաշինյանն այսօր հայտարարել էր, որ պատրաստվում են ավտոերթով Ծաղկաձոր հասնել՝ խափանելու ՀՀԿ-ի նիստը, բայց չեն հասցրել. այն ավելի վաղ է անցկացվել: Հանրապետական Գագիկ Մինասյանը վստահեցնում է, որ Խորհրդի նիստը Ծաղկաձորում անցկացնելու որոշումը վաղուց է կայացվել եւ Փաշինյանի հայտարարության հետ ոչ մի կապ չունի:
Երեկ Ազատության հրապարակում մեկնարկած ցույցը վերածվել Ֆրանսիայի հրապարակում նստացույցի: Նիկոլ Փաշինյանի նախաձեռնած ակցիայի մասնակիցների մի մասը հրապարակում է անցկացրել: Գիշերը, ընդհանուր առմամբ, հանգիստ է անցել՝ բացառությամբ սադրանքի մեկ դեպքի:
Իսկ այսօր ակցիան նոր զարգացումներ է ունեցել: Ցուցարարները Ֆրանսիայի հրապարակից երթ են ձեռնարկել քաղաքի կենտրոնական փողոցներով՝ հասնելով Հանրային ռադիոյի շենք: Նրանք ձեռքերը պարզած մտել են շենք, վեր բարձրացել, իսկ հետո կոտրել դռներից մեկը: Նիկոլ Փաշինյանն ուղիղ եթեր էր պահանջում՝ ժողովրդին կոչով դիմելու համար: Ռադիոյի ղեկավարությունը, սակայն, մերժել է, փոխարենն առաջարկել ավելի ուշ ուղիղ եթերում հաղորդավարի հետ միասին հաղորդման մասնակցել: Այս առաջարկն էլ Փաշինյանն է մերժել: Ի վերջո, նա ժողովրդին ուղերձով դիմել է նրա հետ ռադիոյի շենք մտած մյուս լրատվամիջոցների ուղիղ եթերում:
Ի դեպ՝ այդ ընթացքում ռադիոյի շենքը հոսանքազրկվել է: ՀԷՑ-ը պարզաբանել է, որ ընդամենը վթարային անջատում էր: Կարճ ժամանակով նաեւ դադարեցվել է Հանրային ռադիոյի հեռարձակումը, իսկ ցուցարարների հեռանալուց հետո՝ վերականգնվել:
Ցուցարարները ռադիոյի շենքից շարունակել են երթը՝ ճանապարհին քաղաքացիներին կոչ անելով երեկոյան միանալ Ֆրանսիայի հրապարակում անցկացվելիք հանրահավաքին: Մինչ այդ էլ Փաշինյանն ընդդիմադիր ուժերին էր հորդորել միանալ իրենց: Կոչն անարձագանք չի մնացել: Հավելենք, որ գլխավոր դատախազությունն անդրադարձել է Նիկոլ Փաշինյանի եւ նրա աջակիցների կողմից նախօրեին ԵՊՀ-ի, իսկ այսօր՝ Հանրային ռադիոյի շենք մուտք գործելու փաստին: Դատախազությունը ոստիկանություն է դիմել՝ այս փաստերով քրեական գործ հարուցելու հիմքերի առկայությունը ստուգելու նպատակով:
ԱՄՆ-ի նախաձեռնությամբ Սիրիան, ի վերջո, հրթիռակոծվեց: Ապրիլի 14-ի առավոտյան ԱՄՆ-ն, Մեծ Բրիտանիան եւ Ֆրանսիան Սիրիայի ուղղությամբ ավելի քան 100 հրթիռ են արձակել: Ռուսական աղբյուրների տվյալներով՝ Սիրիական հակաօդային պաշտպանության ստորաբաժանումներին հաջողվել է խոցել կոալիցիայի հրթիռների զգալի մասը: Հարվածների թիրախում եղել են Դամասկոսում եւ Հոմսում ինչպես ռազմական, այնպես էլ քաղաքացիական ենթակառուցվածքներ: Հրթիռներն արձակվել են ամերիկյան ինքնաթիռներից եւ նավերից, հարված են հասցրել նաեւ Մեծ Բրիտանիայի եւ Ֆրանսիայի ռազմաօդային ուժերը, իսկ հրթիռակոծությունը շուրջ 50 րոպե է տեւել: Տարբեր աղբյուրներ հաղորդում են մինչեւ 6 խաղաղ բնակչի տուժելու մասին:
ԱՄՆ պաշտպանության նախարարությունն այս գործողությունը «միանգամյա» են անվանել. առաջիկայում նոր հարվածներ ամերիկացիները չեն նախատեսում։ Պենտագոնում, միաժամանակ, նշել են, որ իրենց հետագա քայլերը կախված կլինեն Սիրիայի նախագահի գործողություններից: Դոնալդ Թրամփը հայտարարել է, որ այս հարձակումը պատասխանն է այն բանի, որ Ռուսաստանը Բաշար Ասադին հետ չի պահել Դումայում քաղաքացիական բնակչության դեմ քիմիական զենքի կիրառումից: Իսկ Մոսկվան հիշեցրել է, որ նման գործողություններն անհետեւանք չի թողնի:
Ռուսաստանում դժբախտ պատահարի հետեւանքով 5 հայ է զոհվել. 4-ը Հայաստանի քաղաքացիներ են, մեկը՝ Ռուսաստանի: Ուֆա քաղաքում դիտահորում աշխատանքներ կատարելիս մահացել են 35-ամյա Կամո Պետրոսյանը, 56-ամյա Մերուժան Աֆանիկովը, 37-ամյա Սուրիկ Աֆանիկովը, 56-ամյա Ռոբերտ Հակոբյանը եւ 29-ամյա Ռաֆիկ Գրիգորյանը: Եվս մեկը՝ 45-ամյա Ռուստամ Մելքոնյանը, հիվանդանոց է տեղափոխվել:
Մահացածներից երկուսն ազգականներ են՝ փեսա ու աներ, Ուֆա էին մեկնել արտագնա աշխատանքի: Նախնական տվյալներով՝ տղամարդիկ թունավորվել են շմոլ գազից: Ըստ տեղեկությունների՝ ռեստորանի աշխատակիցներից մեկը, որի դիտահորում տեղի է ունեցել դժբախտ պատահարը, իջել է ջրհոր՝ ջուրը միացնելու, բայց կորցրել է գիտակցությունը: Նրան օգնության շտապած մյուս աշխատակիցները նույնպես ուշագնաց են եղել: Տեղական լրատվամիջոցները գրում են, որ բոլորն առանց դիմակների եւ համապատասխան հանդերձանքի են եղել:
Գյումրիում բնակելի շենքի 4-րդ հարկից 2.5 տարեկան երեխա է ընկել: Փոքրիկը գիշերը մահացել է. մասնագետների տեղեկացմամբ՝ նա կյանքի հետ անհամատեղելի վնասվածքներ էր ստացել: Տղայի մոտ պոլիտրավմա էր ախտորոշվել, վնասվել էր գլխուղեղը, աջ թոքը, երիկամները: Դժբախտ պատահարից հետո երեխային Գյումրիից Երեւան էին տեղափոխել:
Կյանքից հեռացել է «Օսկար» մրցանակի կրկնակի դափնեկիր, ազգությամբ չեխ ամերիկացի ռեժիսոր Միլոշ Ֆորմանը: Հայտնի ռեժիսորը 86 տարեկան էր: Ֆորմանի սիրված ժապավեններից են «Ամադեուս», «Ժողովուրդն ընդդեմ Լարի Ֆլինթի» եւ «Վալմոն» ֆիլմերը: Իսկ ամենահայտնի՝ «Թռիչք կկվի բնի վրայով» ֆիլմը ստացել է Ամերիկյան կինոակադեմիայի բոլոր հինգ գլխավոր պարգեւները՝ լավագույն ֆիլմ, լավագույն սցենար, լավագույն ռեժիսոր եւ դերասանական խաղի համար:
Ապրիլի 15-ին հանրապետության տարածքում թաց ձյան տեսքով տեղումներ են սպասվում: Օդի ջերմաստիճանը 3-5 աստիճանով կնվազի, այնուհետեւ նույնքան կբարձրանա: Երեւանում վաղը գիշերը տեղումներ են սպասվում, ցերեկը՝ առանց տեղումների եղանակ: Մայրաքաղաքում գիշերը կդիտվի +6+8, ցերեկը՝ +19+21 աստիճան տաքություն:
