ՆԱՏՕ-ի բոլոր 29 անդամները աջակցել են Սիրիայի ուղղությամբ Միացյալ Նահանգների, Մեծ Բրիտանիայի եւ Ֆրանսիայի հրթիռային հարձակումները՝ որպես ենթադրյալ «քիմիական հարձակման» հետեւանք: Այս մասին հայտարարել է ՆԱՏՕ-ի գլխավոր քարտուղար Յենս Ստոլտենբերգը:
Նրա խոսքով՝ Սիրիայի դեմ հրթիռային հարձակումը ցույց տվեց, որ քիմիական զենքը չի կարող կիրառվել անպատժելիորեն: Նա նշել է, որ Միացյալ Նահանգները, Մեծ Բրիտանիան եւ Ֆրանսիան հայտնել են, որ դա «շատ հաջող ակցիա» էր, ինչը զգալիորեն վնասեց Սիրիայի նախագահ Բաշար Ասադի՝ «մոտ ապագայում քիմիական հարձակումների իրականացման հնարավորությունները»:
Ստոլտենբերգը նշել է, որ ՄԱԿ-ի Անվտանգության խորհրդում Ռուսաստանի դիրքորոշումը ԱՄՆ-ին, Մեծ Բրիտանիային եւ Ֆրանսիային այլ տարբերակ չթողեց, քան «սիրիական առանցքային օբյեկտներին» հարված հասցնելը:
Նրա խոսքով՝ ՆԱՏՕ-ի դաշնակիցները «սպառել էին ՄԱԿ-ի Անվտանգության խորհրդում դիվանագիտական եւ քաղաքական միջոցներով» այս հարցի լուծման բոլոր հնարավոր ուղիները: «Ես չեմ ասում, որ այս հարձակումը լուծեց բոլոր խնդիրները, սակայն ոչինչ չանելու այլընտրանքի համեմատ, դա ճիշտ էր», - ասել է Ստոլտենբերգը:
