2017թ. առաջին եռամսյակի համեմատ այս տարվա նույն ժամանակահատվածում 100 տոկոսով ավելացել են ճանապարհատրանսպորտային հանցագործությունները: Այդ մասին զեկուցվել է գլխավոր դատախազությունում կայացած աշխատանքային խորհրդակցության ընթացքում։
Նշվել է, որ 30 դեպքով կամ 115 տոկոսով ավելացել են երթեւեկության կանոնների խախտման՝ մահվան ելքով դեպքերը: Զեկուցվել է նաեւ, որ դրանց կառուցվածքում շոշափելի քանակ են կազմել ինքնավթարները:
Հաշվի առնելով նշված միտումները, ինչպես նաեւ հատկապես երթեւեկության մասնակիցների անվտանգության տեսանկյունից այս բնույթի հանցագործությունների հանրային վտանգավորության բարձր աստիճանը՝ ՀՀ գլխավոր դատախազը խորհրդակցության ընթացքում դատախազության ստորաբաժանումների ղեկավարներին հանձնարարել է ակտիվացնել դատախազական ողջ գործիքակազմը՝ այս հանցատեսակի կանխարգելման, քննության արդյունավետությունը բարձրացնելու ուղղությամբ: Մասնավորապես հանձնարարվել է ճանապարհատրանսպորտային հանցագործությունների դեպքերով օպերատիվ կերպով ապահովել դատախազների անմիջական մասնակցությունը օպերատիվ-հետախուզական, քննչական անհետաձգելի գործողությունների պլանավորմանը, դեպքի հանգամանքները պարզելուն ուղղված աշխատանքներին, իրենց իրավասության շրջանակներում անհրաժեշտ ցուցումներով ապացուցման գործընթացն արդյունավետ կազմակերպելու նպատակով:
