Հռոմում 88 տարեկանում մահացել է իտալացի ռեժիսոր եւ սցենարիստ Վիտորիո Տավիանին, հայտնում է ANSA-ն:
Այս մասին ասել է նրա դուստրերից մեկը:
Նա հստակեցրել է, որ հոր կամքի համաձայն՝ ընտանիքը հրապարակային հուղարկավորություն կանցկացնի, իսկ Տավիանիի մարմինը կդիակիզվի:
Վիտորի Տավիանին իր բոլոր կինոնկարները նկարահանել է կրտսեր եղբոր՝ Պաոլոյի հետ:
Տավիանի եղբայրներն իրենց առաջին լուրջ աշխատանքը թողարկել են 1962 թվականին: Նրանց հաջորդ ժապավեններին սպասում էին Բեռլինի, Կաննի, Վենետիկի եւ Մոսկվայի կինոփառատոների մրցանակները: 2007 թվականին Վիտորիո եւ Պաոլո Տավիանիները նկարահանել են «Արտույտների ագարակը» պատմական դրաման:
Հանդիսատեսին ֆիլմը ներկայացնելիս հեղինակներն ասել են. «Այս ֆիլմի ստեղծմանը մեզ դրդեց մեղքի զգացումը: Երեք տարի առաջ, գրեթե պատահաբար մենք տեղեկացանք հայ ժողովրդի ողբերգության մասին… {…} 1915 թվականին տղամարդկանց, կանանց, երեխաների զանգվածային սպանություններ, եւ այս ամենը հանուն Մեծ Թուրքիայի: Այդ ժամանակներից տասնամյակներ են անցել, սակայն հայրեն այդպես էլ արդարության չեն հասել, իսկ մենք՝ մեզ նման միլոնավորները նույնիսկ այդ մասին չէինք կասկածում: {…}
Մենք մեզ բռնեցինք կինեմատոգրաֆին այն բանի մեջ ներգրավելու մտքի վրա, որը կարելի է անվանել մեր ժամանակների ամենամռայլ ողբերգությունը՝ իրար հետ կողք կողքի ապրող եղբայրական ժողովուրդների, էթնիկ խմբերի զանգվածային սպանություններ, այստեղ Սերբիայում, Կոսովոյում, որոնցից մեզ բաժանում է ընդամենը մի փոքրիկլ ջրատարածք, ինչպես նաեւ Ասիայի եւ Աֆրիկայի երկրներում: {…} Մեզ հետաքրքիր էր հետեւել կոնկրետ հերոսների յուրահատուկ ճակատագրին, որոնք հետո պրոյեկտվել են զանգվածային հավաքական երեւույթի, որը բացահայտել է այսօրվա ցեղասպանության ամբողջ սարսափը, իսկ արմատներով անցյալ է գնացել: {…}
Մենք կարծում ենք, որ Թուրքիայի Հանարպետությանն անհրաժեշտ է մտնել Եվրոպական միություն, բայց մենք նաեւ համոզված ենք, որ նա պետք է հրապարակայնորեն ճանաչի հայկական ողբերգությանն առնչվող պատմական ճշմարտությունը՝ այնպես, ինչպես Գերմանիան եւ Իտալիան ժամանակին հաշտվեցին իրենց քրեական անցյալի հետ»:
«Արտույտների ագարակը» նկարահանվել է Անտոնիա Արսլանի համանուն վեպի հիման վրա: Անտոնիան, որը հայկական ծագմամբ իտալուհի է, պատմել է իր ընտանիքի պատմությունը, որը ցեղասպանության է ենթարկվել: «Արտույտների ագարակը» ֆիլմ-ապաշխարանք է, պատմական արդարության հասնելու փորձ, քանի որ Թուրքիան մինչեւ հիմա հայ ժողովրդի առջեւ իր մեղքը չի ընդունում:
Նշենք, որ Տավիանի եղբայրները կինեմատոգրաֆ են եկել 1952 թվականին՝ մասնակցելով «Մրցակցություն» ֆիլմի աշխատանքին: Ավելի ուշ Վալենտինո Օրսինիի հետ մի քանի կարճամետրաժ վավերագրական ֆիլմեր են նկարահանել:
1977 թվականին «Հայր տերը» ստացել է Կաննի փառատոնի «Ոսկե արմավենու ճյուղ»: