Երբ որ մարդիկ խախտում է օրենքները պիտի պատժվեն դրա համար: Այս մասին NEWS.am-ի հետ զրույցում ասաց ԱԺ ՀՀԿ խմբակցության պատգամավոր Գագիկ Մինասյանը` անդրադառնալով Նիկոլ Փաշինյանի եւ իր կողմնակիցների Հանրային ռադիոյի շենքը գրավելուն:
«Ամեն ինչ իր բնականոն հունով է ընթանում, երբ որ մարդիկ խախտում է օրենքները պիտի պատժվեն դրա համար, եթե չեն խախտում, ուրեմն ամեն ինչ նորմալ է: Ես իրավաբան չեմ, բայց եթե հանցակազմ չլինի, որեւէ բան չի լինի, իսկ եթե կլինի պատասխանատվության կենթարկվեն», -ասաց նա:
Պատգամավորի կարծիքով քաղաքական գործիչները արտահայտում են ժողովրդի որոշակի շերտի պահանջները, իսկ Նիկոլ Փաշինյանի նախաձեռնած շարժման դեպքում ակնհայտ դարձավ, որ նրան հետեւողների բավական փոքրաթիվ են. «Ակնկալիքները, որի մասին խոսում էին հավաքի կազմակերպիչները, բնականաբար չեն արդարանում եւ դա խոսում է այն մասին, որ այդ շերտը, որն ունի այդ պահանջմունքը, բավականին փոքր է»:
ԱԺ ՀՀԿ-ական պատգամավորը հավելեց, որ ԱԺ շենքը շրջափակելը, ինչի մասին իր ելույթներում հայտարարել է Նիկոլ Փաշինյանը, հակաօրինական գործողություն է:
«Որեւէ մեկն իրավունք չունի Հայաստանի քաղաքացու ազատ տեղաշարժի իրավունքը սահմանափակել եւ երկրորդը պատգամավորները ժողովրդի կողմից պատվիրակված լիազորություններ ունեն, իսկ լիազորություններից մեկը նիստերին մասնակցելն է եւ դրան խոչընդոտելը նույնպես օրենքից դուրս բան է», -ասաց Գագիկ Մինասյանը:
Նշենք, որ ապրիլի14-ին Նիկոլ Փաշինյանն իր կողմնակիցների հետ միասին մտել էր Հանրային ռադիոյի շենք եւ ուղիղ եթեր պահանջել, սակայն նրան հրաժարվել էին ուղիղ եթեր տրամադրել, ապա քիչ անց շենքում լույսերն էին անջատել: Նիկոլ Փաշինյանը նաեւ հայտարարել է, որ ապրիլի 17-ին իր կողմնակիցների հետ շրջափակելու է ԱԺ շենքը, որպեսզի թույլ րտա պատգամավորների մուտքը շենք:
Ավելի վաղ NEWS.am-ը հայտնել էր, որ «Քաղաքացիական պայմանագիր» կուսակցությունը՝ Նիկոլ Փաշինյանի գլխավորությամբ, մարտի 31-ից քայլարշավ է սկսել Հայաստանի քաղաքներով, որն ավարտվել է ապրիլի 13-ին, Ազատության հրապարակում շուրջօրյա հանրահավաքով, ապա նստացույցով Ֆրանսիայի հրապարակում: Նրանք հայտարարել են, որ մտադիր են ապրիլի 17-ին շրջափակել ԱԺ շենքը, նաեւ պատգամավորների տները եւ թույլ չտալ, որ նրանք մասնակցեն ԱԺ-ում վարչապետի ընտրությանը: «Ելք» դաշինքի մյուս երկու կուսակցությունները՝ «Լուսավոր Հայաստանը» եւ «Հանրապետությունը» չեն միացել այս պայքարին:
Հիշեցնենք, որ ապրիլի 17-ին ԱԺ հատուկ նիստում տեղի կունենա վարչապետի ընտրությունը: ՀՀԿ-ն վարչապետի թեկնածու կառաջադրի Սերժ Սարգսյանին: