Սերժ Սարգսյանին վարչապետի թեկնածու առաջադրելու վերաբերյալ ՀՀԿ-ՀՅԴ խմբակցությունների համատեղ նիստը խորհրդարանում տեւել է շուրջ 5 րոպե:
NEWS.am-ի թղթակիցը հաղորդում է, որ նիստից հետո Հանրապետականներն արագ լքեցին դահլիճը՝ հրաժարվելով պատասխանել լրագրողների հարցերին:
ՀՀԿ Խմբակցության ղեկավար Վահրամ Բաղդասարյանը մեր թղթակցի հետ զրույցում վստահեցրել է, որ վարչապետի ընտրությունը տեղի է ունենալու Ազգային ժողովի շենքում: Հիշեցնենք, որ լրատվամիջոցներում լուրեր են շրջանառվում, որ ԱԺ հատուկ նիստը կլինի արտագնա:
«Մեր աշխատավայրն Ազգային ժողովն է, այստեղ է լինելու ընտրությունը»,- ասաց նա:
Անդրադառնալով ՀՀԿ խորհրդի նիստը Ծաղկաձորում անցկացնելուն՝ Վահրամ Բաղդասարյանը պնդել է, թե դա փախուստ չէր, իրենք նախկինում էլ արտագնա նիստեր արել:
Հիշեցնենք, որ ապրիլի 17-ին ԱԺ հատուկ նիստում տեղի կունենա վարչապետի ընտրությունը: ՀՀԿ-ն վարչապետի թեկնածու կառաջադրի Սերժ Սարգսյանին:
