Հայաստանում իշխանափոխություն տեղի չի ունենում։ Այս մասին «Իզվեստիա» թերթին տված հարցազրույցում հայտարարել է Հայաստանի Հանրապետության նախկին նախագահ Սերժ Սարգսյանը, որի թեկնածությունն առաջադրվել է ՀՀ վարչապետի պաշտոնում:
Բնութագրելով երկրի նոր նախագահին՝ Սարգսյանն ասել է. «Արմեն Սարգսյանը երիտասարդ տարիքում հեռանկարային ֆիզիկոս էր։ 1990–ականների սկզբին նշանակվել է որպես Մեծ Բրիտանիայում մեր դեսպան։ Ապա աշխատել է վարչապետի պաշտոնում։ 2013 թվականին վերադարձել է Միացյալ Թագավորություն որպես դեսպան։ Երբ մենք մտածում էինք նախագահի թեկնածության մասին, եկանք այն եզրակացության, որ նա ամենահարմար թեկնածուն է։ Նա ծանոթությունների լայն շրջանակ ունի Ռուսաստանում, Արեւմուտքում, արաբական աշխարհում։ Նա կարող է մեր երկիրը պատշաճ մակարդակով ներկայացնել միջազգային հարթակում։ Խոսքն արտաքին քաղաքականության մասին չէ, այլ արտաքին կապերի։ Դրանք տարբեր են։ Բացի այդ, նա լայնորեն հայտնի է Սփյուռքում։ Այդ պատճառով, նա կարող է համախմբող դեր խաղալ Հայաստանի սահմաններից դուրս ապրող մեր հայրենակիցների համար։ Նա կարող է խթանել հայրենադարձությանը»։
Սարգսյանի խոսքով՝ Հայաստանում տեղի է ունենում ոչ թե իշխանափոխություն, այլ փոխվում է կառավարման ձեւը։ «Մինչեւ 2022 թվականը ե՛ւ արտաքին, ե՛ւ ներքին քաղաքականությունը կյանքի կկոչի խորհրդարանական կոալիցիան։ Ոչ ոք չի կարող փոխել կուրսը։ Իսկ Արմեն Սարգսյանի պարագայում դա անհնար է, քանի որ նա լավ գիտի Ռուսաստանը, հրաշալի տիրապետում է ռուսերենին, ոչ միայն ռուսական մշակույթի, արվեստի գիտակ է, այլ դրանք արժեւորող։ Նույնիսկ եթե դա հնարավոր լիներ, ապա ինչու՞»,–հավելել է նախկին նախագահը։
