Թուրքիայում սկսվել է բողոքական եկեղեցու ամերիկացի քահանայի դատավարությունը, ով վերջին մեկուկես տարին անցկացրել է թուրքական բանտում: Թուրքական իշխանություններն Էնդրյու Բրանսոնին մեղադրում են Քրդական աշխատավորական կուսակցության, ինչպես նաեւ իսլամական քարոզիչ Ֆեթուլլահ Գյուլենի հետ համագործակցության եւ լրտեսության համար: Նրան մինչեւ 35 տարվա ազատազրկում է սպառնում, փոխանցու է AFP-ն:
Ելույթ ունենալով դատարանում՝ Բրանսոնը վճռականորեն մերժել է իրեն ուղղված բոլոր մեղադրանքները: Էնդրյու Բրանսոնը, ով գլխավորում էր Իզմիրում գտնվող բողոքական եկեղեցին, ձերբակալվել էր թուրքական իշխանությունների կողմից 2016 թվականի հոկտեմբերին:
«Ես ուզում եմ, որ ճշմարտությունը ջրի երես դուրս գա: Ես որեւէ անօրինական գործունեության չեմ մասկակցել: Ես ոչինչ չեմ արել Թուրքիայի դեմ: Ընդհակառակը՝ ես սիրում եմ Թուրքիան եւ վերջին 25 տարվա ընթացքում աղոթել եմ Թուրքիայի համար», - ավելացրել է Բրանսոնը, ով Թուրքիա էր տեղափոխվել 1993 թվականին եւ 2010-ին եկեղեցի էր բացել Իզմիրում:
Բրանսոնը հերքել է Գյուլենի շարժման հետ կապի մասին մեղադրանքները՝ ասելով, որ կրոնի հանդեպ վիրավորանք կլիներ, եթե նա՝ որպես քրիստոնյա, միանար իսլամական շարժմանը: Քահանայի խոսքով՝ նա ոչինչ չգիտեր առաջիկա հեղաշրջման մասին, երբ 2016 թվականի ապրիլին՝ հեղաշրջման փորձից քիչ անց, ԱՄՆ-ից վերադարձավ Թուրքիա:
Հիշեցնենք, որ թուրքական իշխանությունները մեղադրում են Գյուլենին Թուրքայիում պետական հեղաշրջում կազմակերպելու համար: Անկարան պնդում էր արտահանձնել Գյուլենին, ով այժմ ապրում է Փենսիլվանիայում: ԶԼՄ-ների հաղորդումների համաձայն՝ Էրդողանն ԱՄՆ-ին առաջարկել էր Բրասոնին փոխանակել Գյուլենի հետ: